هو غالبا كده ياجماعه مصر والله اعلم حد عملها سحر مش اى سحر دا سحر اسود
واعمال سفليه لالالا دا اكيد حد واخد قطر من مصر ونازل فيه اعمال اعمال وحالف طلاق تلاته مايسيب القطر
الا لما يجيب اخر قطره دم من مصر بقاله 4 سنين وشويه حلوين مش مكفيه كل اللى ماتو
ولا مكفيه الدم اللى بقا للركب وبعدين بقا الساحر الشرير دا مركز عمله الاسود وسحره الاغبر على الناس الغلابه
والشباب الشقيانه وحياتكم حتى مارحم العيال الصغيره البلد بقت ملعونه فى كل حاجه
محدش مرتاح والكل بقا مش طايق نفسه ولا حتى طايق غيره
هنا قنبله هنا جريمه هنا خطف عيال صغيره الله اعلم بحالهم وبحال اهاليهم
وهنا قتل وهناك قتل فى كل مكان تلاقى قتل
بصراحه عندى كلمتين واقفين فى زورى
شماعه الاخوان بقت تقيله وشكل اهاليهكم بقا زفت شوفولكم شماعه تانيه
احنا ممكن نصدقها مرتين تلاته قول عشرين بس اصلا وشكم الوسخ احنا عارفينو من زمان
مش جديد عليكم يعنى القتل والسحل والتعذيب عمركو ماهتنضفوا
هتفضلوا طول عمركم كده واحنا عارفين انكم كده وانتو عارفين اننا عارفين انكم كده
بس احنا بنحب نلعب لعبه الكراسى نفضل ندور حاولين بعض
انا بس اللى نفسه اعرفله اجابه اللى بيقتل نفس دا بيعرف ينام عادى كده زى البشر!
اللى يحط قنبله هنا ولا هناك ويزهق ارواح انت مقتنع فعلا انك كده بتجاهد فى سيبل الله وداخل الجنه !
اللى بيعيش بلطجى طول عمره ويخطف اطفال ويحرق قلب اهاليهم عليهم انتو عايشين ازاى !
البلد بقت ملعونه واللى لعنها ناسها بكل اشكالهم وافكارهم واعمالهم
البلد بقت ملعونه واللى لعنها اللى قبل يسكت من الاول ع كده
البلد بقت ملعونه واللى لعنها هو احنا
عملنا عمل لا اعمال ومش عارفين نفك ولا عمل
حضرنا شياطين وجن وعاشوا وسطنا لحد مااتاكدوا اننا شربنا الصنعه خلاص وحلو من البلد
وفضل شياطين الانس اللى مش عارفين نصرفهم
عشان كده انا هجمع منكم ونجيب بخور ونبخر البلد من عين الحسود يمكن العمل يتفك