جحا و القمة

فى ليله طويله كاءنها دهر
فاتت ع اللى قضوها كشهر
صبح الصبح اتغير حالهم
كل العالم صابها القهر
كان دا فى مملكه الحكايات
كل الابطال ناموا ابطال
صبحوا الصبح بقم خيالات
والسلطان محتاس مشغول
ابطال الروايات فى زهول
عايزين يفهموا اه الاخبار
حواديتهم ليه صابها دمار
راحوا استصدروا دغرى قرار
جحا يحضر حالا على طول
سلطان الحواديت بيقول
ياسى جحجوح جاوب ع التالى
ايه اللى اتغير فى بلدنا
ايه اللى اتبدل ف احوالى
نمنا رجال ما نخاف من عو
صبحنا نخاف م القطه النو
وحكايتنا بقت نهايتها
هزيمه الخير وعلو السو
عنتر بقى راضى العبوديه
وايوب ناعسه صبح قواد
ست الحسن بقت مؤذيه
واشطر واحد بقى عواد
بعد م باع ارضه واتهرب
بعد م كان منبوذ متغرب
بقى قدوه ومثال للعالم
والناس منه بقت بتقرب
وعشان كده انا راسى بتوررر
ونافوخى راخرهيفرررر
عايز اعرف كل دا ليه ؟
قلى يا جحجوح ايه السر
قالوا يامولاياادينى مهله
راح ادخل مكتبتى وادور
واجيللك بالرد دا بكره
ويبقى معايا الحل منور
ولما عاد جحا للسلطان
السلطان اداله امان
جحا بص لكل القاعدين
وسئلهم بقى انتم مين ؟
ردو عليه < اهل الحواديت >
رد عليهم طب عارفين
الحواديت دى بتحكى لمين ؟
قالوا لكل البنى ادمين
رد عليهم خصصوا اكتر
لحسن انا كيلى خلاص فاض
ردو عليه تحكى وتتحاكى
للى بيعرف ينطق< ضاض>
رد وقال الله اكبـــــــــــــــر
كده قربنا وبوضوح اكتر
حالكم من حال اهل لسانكم
لو يتعدلوا راح تنعدلوا
ولو يتغيرو راح تنبدلوا
وتعيشو زى زمان فى امان
السلطان سمع الكلمات دى
راح اصدر فورا فرمان
قال وبسرعه يا سى جحجوح
على ارض الانسان هتروح
وتحاول تصلح وتعدل
وترجع لحياته الروح
جحا كان فرحان قوى وسعيد
اول مره يزور الواقع
حاجه تفرح بالتاكيد !!
بس يا عينى فرحه ماتمت
كل ملامح وشه اهتمت
حس بكسره وضيقه وحسره
والفرحه فى عيونه اغتمت
دى الامه صبحت مهزومه
حطان مهدومه بتنشع دم
والدم العربى يا خلايق
سايل ومحدش مهتم
والعربى مع اعاديه هادى
وعامل سبع على ابن العم
حاول يصلح قال ويغير
لكنه بصراحه اتحير
ولاحدش رضى يسمع منه
لا كبير رضى ولا حتى صغير
جحا اللى كان فى زمانه معروف
بانه شاعر وفيلسوف
ازاى ياناس هيعود بفشله
حقيقى كان جدا مكسوف
وفضل ماشى مدارى الدمعه
خدته رجله لشارع الجامعه
وكان فيه حركه غريبه عجيبه
نادى على واحد فى عنيه طيبه
سئلوا فى ايه ؟
رد عليه0
قالوخلاص راح يعقدوا قمه
وهيتلموا كبار الامه
جحا م الفرحه بقى يتنطط
وقال خلاص هتزول الغمه
وف لحظه بقا جوا معاهم
بقا وسطيهم كده فى دقيقه
والله اعلم ازاى عدا
اصل جحا ما يعدمش طريقه
وبسرعه بدت الجلسات
وصاحبنا جوا يا حضارات
فاتح بقه مبرق عينه
علشان بص لقى الاخوات
نازلين ردح وشتم ف بعض
وبيمسحوا بالقيم الارض
واقف عايز يصلح بينهم
لكن مش سائل فيه حد
*** انت دخيل
لا انت جبان
*** انت عميل
لا انت جعان
* انت منافق عرض وطول
* وانت مغامر غير مسئول
متعفن ودنىء كسول
استهلاكى قمىء واكول
فجاءه ف لحظه بدون تقديم
جحا م الفرسه وقع مقتول

تسلم يا كبير

شكرا مرووووووووووووووووركم جميعا

تسلم ايدك علي التوبيك الرائع

يسلملي مروركم جميعا