قصة منقولة عن اخت ياااااريت المشاركة بالحللول
قررت اكتب لكم قصتي بعد ما خلاااااااااااااااص طهقت زي مابيقولو
القصه من 5سنين
بنت زي القمر ولا ازكي نفسي علي الله
بس الكل يشهد انه جمال غير عادي وده كان نقمتي فى الحياه وبسببه (بس) اختارني زوجي الحالي
انا اصغر اخواتي ال6 والدي رحمه الله عليه مات من زمااااااااااان حتي اني مش فاكره شكله
امي تزوجت بعد وفاته بسنه وسافرت مع زوجها وخلفت وعاشت حياتها واحنا كملت تربيتنا عمتي
وكان فاتها قطر الزواج
عندنا مثل في بلدنا بيقول اللي بلا ام حاله يغم
وفعلا ............حالنا كان يغم
ذقت وبلا فخر جميع انواع واشكال الفقر والقهر والمهانه
وكنت علي شفا اني مااكملش تعليمي بس الحمد لله ربنا ستر
احكيلكم بالترتيب
اخواتي الاتنين الكبار توأم تزوجن من اتنين ابناء عم وعايشين في بلد قريب مننا
وااخواتي التلاته الشباب بين كل واحد التالي سنه كده
ودول الحمد لله ربنا اكرمهم واتعلمو لانهم كانو بيشتغلو ويصرفو علي نفسهم وعليا
لان البنتين الكبار اتجوزو وماعاشوش معانا المأساه
المهم يعني عمتي الله يسامحها طلعت كل عقد العنوسه و الفقر والحبيب اللي رفضو يزوجوها ليه في العبده لله
مكانش قدامها غيري
والفتره دي كانت من رابعه ابتدائي لحد تالته ثانوي
وعلي فكره لما تشوفو حد في الالفيه التالته بيذاكر علي سهرايه ولا حتي شمعه
ماتفتكروش دي مبالغة ...انا كنت كده آه والله لاني ممنوع اذاكر علشان ماستهلكش نور
المهم يعني جبت مجموع حلو جدا ابتدت بقا مأساه الجامعه
ورفضها التام الغير مبرر
اسوق عليها القريب والغريب ...دي ابدا
اخواتي يحالو يتدخلو .......ابدا
اخواتر الرجاله منهم اللي اتوز ومنهم اللي سافر يشق طريقه
بس الموجدين النصيحه كده يعني من بعيد لبعيد وبيني وبينهم يقولولي يعني انتي هالتعملي ايه بالعلام
ده انتي قمر يابت مسيرك للجواز..واقبلي بقا حد من الاكابر الي بيتقدمو
واتسدت الطرق قدامي وخلاص كنت يأست من اني اكمل تعليمي واشتغل يبقا لي قيمه
وانفد بجلدي بقا من المرار ده
وقتها كنت عيله عمري 17سنه
و فجأه
يدق الباب بالحلم اللي مفيش بنت في الدنيا ترفضه مابالكم بقا ببنت في ظرفي انا وقتها
ابن عييييييين اعيان بلدنا بيتقدم للعبده لله
عين اعيان بجد مش هزار
وسرايا عالطريق كنت لما اعدي قدامها بس بافرح واشم ريحه حلوه
وده كان بيبقا كفيل يسعدني ويصبرني قتها
بس ماكنتش شفت شكل جوزي ده قبل كده
كنا بنسمع فلان جاب عربيه جديده فلان عمل فلان سوي
ده دلوعه ابوه
ده هو الكبير الغالي
لو اقولكو احساسي وقتها
كان حاجه اكبر بكتيييييييييييييير من الفرحه
المهم يا اخواتي اتجوزت واتعملي فرح ماكنتش احلم اني اتعزم في فرح زيه اصلا
وحسيت ان الدنيا اخيرا ضحكتلي
وحمدت ربنا وشكرته علي النعمه الكبيره اللي داخله عليها
ومن كرم اخلاق جوزي لاقيته هو اللي بيقولي انتي عاووزه تكملي جامعه
تصورو .......... يااااااااااااااااااااااه ياما انت كريم يارب
وكملت ونخدت الليسانس بتقدير جيد جدا
وانتهي الفقر والعوز والذل من حياتي
عرفت يعني ايه فرحه والعبده لله بقا عندها بدل السرير ابو 3رجل والرجل الرابعه حجر
بيت طويل عريض بتاعي باسمي
وعربيه وسواق وخير كتير والحمد لله
طب المشكله فين؟؟
جزي مثال الشهامه وكرم الاخلاق واهله الطيبين
اللي ماشفتش معاهم يوم وحش واتضاعفت سعادتي لما خلفت ابني
بس
واااااااااااااااااااااااه من بس دي
الانسان اللي انتشلني من الهم والقرف
يطلع مدمن
آه مدمن....مدمن هيروين ومش بيشمه لاء بياخد هيروين في حقن
ولانه ميسور جدا مش بيعاني من مشكله احتياجه للسم الهاري ده لانه موجد وبوفره
مش هادخل في تفاصيل توجع قلبي اكتر واكتر
انا عرفت بالصدفه البحته
بعد مافضل اكتر من سنه مفهمني انها حقن مقويه ولازم يمشي عليها فتره
الكلام ده كان بعد ولاده ابني بكام شهر
وبعد ماعرفت واتأكدت ان دي مخدرات
كلمته كتيييييييييييييير ونصحته وفهمته وخاصمته وعملت كل شي ممكن تعمله زوجه بتحب زوجها اللي ربنا جعله سبب
في تغيير حياته ومش ناسيه ابدا انه صاحب فضل كبير عليا
بس انا عملت اللي ما يعمل بس هو اصلا رافض مبداء انه يتعالج
هو مش عاوز
وصل بيا الامر اني ككلمت حمايا اللي هو ابويا الي عرفت معاه يعني ايه اب بجد
والصدمه انه عارف
اه والله اعارف...طيب ازاي وليه وازاي سايبينه كده
والمفاجئه الاكبر
قالي يابنتي احنا عملنا كل شئ علشان البلاء ده ومفيش فايده
دخل المستشفي قبل مايتجوزك 3مرات
وكل مره يرجع تاني
سافر بره
غيروله دمه ...ودي كانت اول مره اسمه الكلمه دي واستغربت
وقالي مفيش يابنتي في ايدينا غير الدعاء له بالشفاء وان ربنا يتوب عليه
حسيت اني اتصدمت واتهزيت من جوايا وابتديت افهم استرجع من يوم ما اتجوزنا
نظرات كتير واتلميحات كتير وحاجات كانت بتدور حواليا بس انا مش مخونه
ولان جوزي مشعر جدااااااا عمري ماشفت اثر لحقنه ولا حاجه زي ما بنشوف فالافلام
بجد الوضع مختلف عن اللي بنسمع عنه
اللي حفزني اكتب واريح قلبي شويه من اللي فيه
هو ان من الواضح كده ان جوزي ابتدي العد التنازلي
هو من برا حلو وزي الفل وقمرين مش قمر واحد
بس عاوزه اقولكم علي سبيل المثال وليس الحصر
اننا مثلا مفيش بينا علاقه زوجيه بقالنا سنتين و8شهور
مصدومين صح
ده انا اللي زيي لسه مااتجوزوش اصلا وانا متمرره كده
جوزي قدام عيني وبينام جنبي علي سرير واحد و اخواااااات
والناس حسداني علي جمالي وعلي العز اللي بقيت فيه وانا حتي ابسط حقوقي كا انسانه وزوجه مفيييييييييييش
انا بجد بقا وتعبانه اوي اووووي واعوذ بالله من الشيطان لولا تمسكي بصلاتي
كنت ضعت
طيب اعمل ايه
مش قادره انسي الحلو اللي عمله معايا كله
وانه ابو ابني الوحيد الله يخليه ليا
وانه قصه الحب الجميله والوحيده في حياتي
بس كمان مش قادره انسي انه خدعني وضحك عليا
وقبل يعاشرني وهو بالوضع ده
وكمان راااااااااااااافض مبداء العلاج بتاتا
وابوه زي ما حكيت لكم الراجل مخلاش علي جهده جهد
بقيت اخاف اسيبه مع ابننا وحدهم لا الولد يشوف منظر كده ولا كده
انا خلااااااااااااص هاموت
دلوني الله يخليكو
وسامحوني اني ازعجتكو بقصتي الطويله
بس بالله عليكو قولولي اتصرف ازاي انا ومش هاخبي عليكو اعصابي تلفانه
وبقيت عصبيه اوي
ومشتتهه
مش عارفه اعمل ايه الله يرضي عليكو اللي عندها حل تنجدني بيه
ربنا معاها وانا شايف انك تصبرى وتحاولى اكتر