رثاء هشام الجخ لابنته

يا حتة القلب اللي مات..
وَعْد يا ست البنات

حافضل أحبك من سكات
واشرب سجاير برة أوضتك من سكات
والبس هدومي وانتي نايمة واقفل الباب من سكات
وافضل أعلّم كل شهرين جوة كشف التطعيمات..

وافضل أَحَوِّش لك جهازك واشتري لك طقم صيني
وابقى حالق دقني دايما وانتي بس اللي تبوسيني
إوعي ماما تعرف اننا جبنا شيبسي
فكّريني واحنا نازلين ابقى اجيب لك بُكرة بيبسي
ما تتشاقيش في المدرسة ومتلعبيش وسط الولاد
وفكريني ابعت معاكي صورة لشهادة الميلاد

ياه ع الوجع لما بتِصْغَر من مرارته أي آه
ولا يصحكش من حلمك .. إلا على شهادة الوفاة.

هشام الجخ

الله يرحمها ويصبرهم