تقريبا كده والله أعلم
قربت أموت
إكمنى بقيت زى البسكوت
فـ سواد الشاى أصبح بايش
والواحد لو مات من جوا
إزاى هيكون براه عايش
تقريبا كده والله اعلم ..
مبقتش ببطل تفكير
فـ بنات فـ حياتى فـ يوم كانو
أو حب انتهى قبل أوانه
والقلب الفاضى وأحزانه
مع ان اساسا سكانه
فـ الأصل كتير !
تقريبا كده والله أعلم
انا بكره هكون واقف تايه
فـ ميدان أحزان
وبدور على وش عشان
يمكن فـ ملامحه أشوف نفسى
وتعدى عليا وشوش ياما
والحيره تزيد
ووشوش تتعاد
وإزاى لو زاد
الخوف انا هنسى فـ يوم نقصى
تقريبا كده والله أعلم ..
اليوم راح يخلص كالعاده
وانا لسه متوبتش عن ذنبى
وبقول أهى توبه وجايه فـ يوم
وآدان الفجر اهو بيأذن
وانا لسه مروحتش عـ الجامع
وبمثّل منيش سامع
وبروح فـ النوم
تقريبا كده والله أعلم
البطله دى هتموت فـ الآخر
وهتهرب أحلام من جوزها
فـ حجات فـ ادينا ومنعوزهاش
وإن جينا فـ يوم مره نعوزها
بتروح من ايدنا ومنلقيهاش
تقريبا كده والله أعلم ..
قربت أموت ..
وسألت إزاى..
هيموت واحد
فـ كشوف الدنيا الحلوه مجاش
اتسجل إسمه فـ دفاترها
مع انه لا حبها يوم ولا عاش
وكإنه مجرد بسكوت باش
فـ سواد الشاى
موضوع: تقريبا كده والله أعلم 
الثلاثاء 16 يوليو - 2:04
