مفهاش حاجات ببلاش

صوت قفلتك....
لآخر سوستة ف الشنطة.....
صوت طبطبة إيدك....
بالراحة ع الباك باك(backpack)....
فرافيت تذاكر سفر.......
قطّعّتها أونطة....
سندة عنيك و إيديك....
ف الباص على الشباك....
فيه حاجات كتير عايزاك.....
تفضل كده مسافر.....
فى طريق مالوش آخر ….
إكمنها حتموت....
ف الرحلة من غيرك....
فيه حاجات كتير عايشاك....
خايفاك تبطلها ….
و حاجات كتير عايزاك....
لاكن معطلها...
إن إنتا مش عايز....
جايز...
حاجات منها....
حتعيش و تستناك ….
جايز حاجات تانية...
ف الزحمة راح تنساك....
زي اللي راحوا زمان....
حتبطّل الدخان ؟...
ولاعتك السخان ….
و سجايرك البوسطن...
حيموتوا من غيرك …
حتبطل الأحزان ؟...
كشكولك المليان...
بـقصايدك الجايه....
حيعيش لمين غيرك ؟...
جسمك حجزله مكان...
بالعافيه جوه الكادر...
ميت إيد على كتافك....
ميت بصة على وشك....
كل الحاجات حواليك...
ف الكادر سانده عليك....
لو جيت وشلْت إديك....
الصورة تتفركش ….
ضلك على الحيطة ….
كان خافي عنها النور ….
و طلّعها بتنغمش....
كفك على السفره....
من غيره كان إزاي...
مفرشها يتكرمش ؟....
بصمة صباع إيدك...
لسّاها ع الشبابيك...
ميت ألف تفصيلة...
ملهاش وجود غير بيك....
و إنتا عليك تختار...
حتبدّي مين على مين ؟....
و تبدّي إيه على إيه ؟....
الجاي و الجايين ؟
و للا اللي خدت عليه ؟
أصل الحياه للعلم....
مفهاش حاجات ببلاش....
و عشان ماتصبح فيلم.....
و أصلا عشان تتعاش....
كادر الحياه المشحون...
فرح و ألم و شجون....
لازم يكون ...بيلف....
لازم يكون…. بيدور....
يتقل عليك و يخف....
و يعشّمك بالنور....
ف نهاية المشوار.....
و نا قلبي لف و دار.....
ميت ألف ليل ونهار....
نفسه ف فرحه كادوه.....
و حلاوة من غير نار....
و امّا الزمن تعبه...
قصقص شريط الفيلم....
خَد كادر كان عاجبه....
و قرر يعيش ف الحلم.....
و الحلم كان كامل...
جدا تمام خالص...
و لجل الكمال لله....
كل الحاجات جواه....
لاكن في شيء ناقص....
فاضي بشكل غريب....
إيه اللي سبته هناك؟...
ف تلاقي ف الكراكيب....
صورة القمر و ياك …
متشاله ف الكشكول...
باصه ف عنيك علطول...
وكأنها بتقول....
بالذمة مش واحشاك ؟....