دى كوره وجمعتنا زمان ..
فـ ليلة عيد .. أجازة صيف
فـ ملعب إيجار ..
فـ ليل أو نهار
فـ حاره .. فـ مدرسه .. فـ شارع !
من الآخر فـ اى مكان يكون واسع
ويوم ورا يوم وجون ورا جون ..
وانا بكبر .. بشجع نادى
لونه أحمر بلون دمى
كما والدى وكما عمى
خدت حبه بالوراثه ..
وكنت شاطر فـ الدراسه
زى ما فـ اللعب كنت
ايوه فاكر لما خدنا الدورى منهم
فرق بونت !
أيو فاكر جون تريكه فـ الصفاقصى
وجون شهاب فـ الإتحاد ..
أيوه فاكر جون عماد ..
والشيخ اسامه فـ ماتش عمره
نهائى كاس ألفين وسبعه
كنت جنبه فـ كل حته وكنت مخلص
فـ المتابعه ..
كنت فـ الاستاد بغنى ..
غنوه للنادى وكيانه
كنت عارف كل لاعب
وكنت عارف فين مكانه
فجأه زى العاده واقف
ضربه جاتنى من ورا
صاحبى كان بيقولى حاسب
بس جات متأخره ..
والضربه سبقت صوت زميلى
ومت زى كتير فـ جيلى ..
وكنت كاتب فوق تيشرتى لما
مت فـ بورسعيد
إنى لو بطلت أشجع يبقى انا ميت أكيد !