الوضع العام ..
بتنام وتقوم وتقوم وتنام ..
وروتين فـ روتين فـ روتين فـ روتين
مش عارف فين بيروح على فين ؟!
أيامك يوم واحد داير ..
حوالين إصحاب .. و حبيبه وبيت
_ انا أكتر واحد عاش يحلم _
و انا أكتر واحد قولت ياريت
انا أكتر واحد قال عايز
والدُنيا قالتله براحتك عوز
الدور اللى حلمت تطوله
كان دور محجوز ..
مفضلش فـ فيلمك وحلمك
غير دور أراجوز ..
وعجبنى الدور أول ما بدأت
لكن مليت بمرور الوقت
ولقيتنى بدون أسباب إشتاقت
لحاجات مبقيش منهم حاجه
من طبع الحاجه انها دايما
كل ما بتزيد تنقص حاجه
و لإن الواقع مش دايما
زى الأفلام ..
و لإن الأيام مهوسه
بهد الأحلام ..
يتلخص كل الوضع العام
ان انا دلوقتى هنام وهقوم
وان قومت هكرر يومى و أنام !