انا مش راضي عن نفسي ، نفسي ابقى احسن ، نفسي اطور واغير من حياتي .. اعمل ايه ؟ .. وابتدي ازاي ومنين، طب مين هيساعدني ، وايه هي اول خطوة علشان اتغير للأحسن ؟ التغير شيء جميل خصوصا لو كان للأحسن و لو كان تغير صفات سيئة الي آخره جيدة ومفيدة لصاحبها واللي حواليه ، لكن علشان ابقى افضل لازم اعرف ايه المميزات والعيوب اللي فية والعيوب الأول من غير ما انكر المميزات لانها الحافز لية عشان اتغير للأفضل .
• طيب ايه هو التغير ؟
- البعض بيعرف التغيير غلى انه التحول من مرحلة في حياة الانسان الي مرحلة تانية افضل كان الانسان يأمل في الوصول اليها ، يعني ان الانسان يغير من نفسه ومن حياته واسلوب تفكيرة وطريقة عمله علشان يوصل لهدفه .
• يعني ايه برضه ؟
- يعني ان الانسان عايز حياته تبقى افضل ، عايز يشعر بأهميته في الحياة ، عايز يشعر باحترام الناس ليه ، و التغيير بيبدأ لما الانسان يسأل نفسه اسئلة كتيرة منها :
هو انا سعيد ولا لأ ؟ .. طيب لو لأ ليه ؟
هو انا راضي عن حياتي والي وصلتله فيها ؟
طب ممكن اكون افضل من كده واطور من نفسي ؟
من هنا يبدأ الانسان يشعر برغبة في التغيير .
- لازم تسأل نفسك .. انا هقدر اقدم ايه لنفسي وللمجتمع علشان اكون اتغيرت للأفضل ؟ ايه هي الحاجات اللي لازم اغيرها في نفسي ؟
- اولا : لازم اغير طريقة تفكيري لو كانت مش ايجابية ..
- ثانيا : اغير طريقة حياتي من ترتيب الأولويات وتنظيم المواعيد واوقات الراحة وممارسة الهوايات وتنمية المهارا ت والتقرب لله سبحانه وتعالى بالاضافة للاهتمام بالصحة .
- ثالثا : تغيير المباديء والمعتقدات الخاطئة السائدة في المجتمع زي :
• وانا مالي خليني في حالي ..
• اشوف الغلط بعيني واسكت ..
• ما اشاركش في مناقشة او موضوع يهم مصلحتي وحياتي ..
• على قد لحافك مد رجليك ..
• القناعة كنز لا يفنى ..
- كل الحاجات اللي فاتت احنا فاهمنها وبنطبقها غلط .. يعني هو لما اشوف الغلط وما اتكلمش ده اكيد هيضيع حقي وحق الناس كلها وهيزود من الغلط ده ولما اسكت واقول انا مالي برضه بشارك في انتشار الغلط لحد ما يبقى امر واقع .
- القناعة فعلا كنز لايفنى وفعلا على قد لحافك مد رجليك ، لكن ليه ما كنش طموح وده حق مشروع اني اتعلم واكافح عشان ابقى افضل ليه اسيب نفسي للاستسلام وان ده قدر وقسمة ونصيب .
- لازم أؤمن بقدراتي واعرفها كويس وانميها ، لا اسمح لأي شخص بالتقليل من شأني مهما كان حتى لو اخفقت اكثر من مرة .
- اتعلم من اخطائي واخطاء من سبقوني واستشير من هو اكثر خبرة مني .
- ابدا بالتفكير في كل حياتي : هل انا طالب ام مسئول عن عمل ؟ .. في كلتا الحالتين لازم اجتهد في عملي واتطور فيه باسلوب جديد وابعد عن الروتين ..
- احدد نفسي اوصل لأيه وابدأ بالفعل في الخطوة الأولى.. ايوه الخطوه الأولى .. هي دي اهم حاجة اني ابتدي ما افضلش افكر وبس ، نفسي اتغير وبس ، لأ لأ لازم تبدأ بجد حتى لو هتبدأ كطالب انك تذاكر وتنجح وتحصل على امتياز ... ايوه امتياز ... ليه لأ ؟ انت مش اقل منها بالعكس هو ده التحدي .. لان الدراسة وتفوقك فيها اول الطريق لنجاحك في حياتك العملية ..
- وماتنساش اهم حاجة دايما اتقرب من ربنا وادعيله وهو عمره ما هيخيب ظنك مادمت بتسعى للخير وكل ما تقرب من حلمك كل ما تزيد ثقتك بنفسك وقدراتك .