[center]قالولي زمان وأنا صغير
مفيش إنسان بيتغير
وقالوا الوش والمسكات
تملي عمرها قصير
ومدام الطبع كالعادة
تملي بيغلب التطبيع
هتفرق تربية زيادة
فواحد بالجينات هيصيع !!
أنا صايع علي الفطرة
ولا بكيفي ولا بيدي
وكل ما أقول أكيد فترة
ألاقي العمر بيعدي
ولسة " السنكحة " كيفي
ولسة الصرمحة فدمي
ولسة ببوسها في السيما
وتضحك أقولها اتلمي
ولسة بلف في الشارع
وأنا معرفش رايح فين
وفي الفجرية ع الكوبري
مفيش غيري مع الأسدين
بدندن لحن أغنية
وتيجي أنتي علي بالي
فصوتي يبتدي يقطع
ودمعة في عيني تتلالي
فطلع نوتة الأشعار
وأقطع كل أوراقها
وفرقها .. وتيجي الريح تبعزقها
علي الأسفلت في الشارع
يا ست الكل أنا واقع
فعرضك لجل تقريهم ..
وبعد ما تقري ارميهم .. أو انسيهم
بحكم الطبع والعادة
هيجي قصايدي متعادة
ومادم كار الكلام كاري
ومفيش غيرك فأفكاري
هتفضل كل أشعاري
مفيش غيرك بنات فيهم ..