ذكريات أيام زمان لما كنت فى المعهد قول ذكرياتك هنا وبس

االسلام عليكم ورحمة الله وبركاته
أنا دفعة 2005 من زمان يعنى من ايام المعهد لما كان فى صلاح الدين
لما كنا بنمتحن فى المدرسه العسكرية فى المخيمات مش عارف بقا لسه موجوده ولا اتغيرت
بصراحه الجيل الحالى عايش فى المعهد الجديد ده تحس فعلا انك فى مكان جميل وفى معهد جميل
اما ايام صلاح الدين كانت ايام بقا
أفتكر الدكتور أبو النجا العمرى ودا من الشخصيات المحترمه جدا
والدكتور محمد عماره
والدكتور عبدالناصف شومان الله يرحمه
ومش عارف حد فيكو يعرف الأستاذ حمدى ابو عيانه فى الشئون العامه ولا لأ
دا بقا من الشخصيات التى لن ولم تتكرر فى هذا المعهد
بصراحه كانت ايام حلوه وجميله اه كان المعهد فى صلاح الدين قديم ومبنى مش اللى هوا لكن كانت ايام حلوه
خلاص بقا راحت علينا ودلوقتى بعدنا والشغل خدنا وعلى فكره انا ما اشتغلتش بمؤهلى رغم ان كان نفسى اشتغل بالمؤهل بتاعى بس مش مهم
كفايه انى اتخرجت منه وعلى فكره انا استفدت كتير من الدراسه لأن الدراسه دى كانت شيقه جدااااا
واتعلمنا كتير فى التدريبات اللى كنا بنروحها سواء فى الأبعاديه من ايتام ومسنين واحداث ومدارس
اتمنى لكم جميعا الخير
وانا سعيد جدا انى انضممت لهذا المنتدى الجميل اللى هيرجع ايام زمان

ربنا يوفق الجميع

احمد سميح كوم حماده

منور بيكى
وفعلا الدكتور محمد عماره كان تاعبنا وكان فيه دكتور كمان مش عارف انتى حضرتيه ولأ الدكتور حسن الشيخ
بس بصراحه كان نفسى أحضر فى المعهد الجديد ده بس يلا الحمد الله على كدا

اهلا ومرحبا بيك استاذ احمد

معاك اخوك أحمد دفعه 2008 وسعيد جداااااااا بوجودك معانا يا استاذ احمد

فكرتنا بالايام الجميله بتاعه معهد صلاااح الدين بجد ايام متتنسيش كل ذكرياتي واحلامي والناس اللي حبتهم كانوا في المكان دة

لو حرجع ادرس تاني وقالولي اختار بين المعهد الجديد ولا معهد صلاح الدين حختار معهد صلاح الدين بجد عشت فيه ايام جميله

انا مرحتش المعهد الجديد ولا مرة بس اول مرجع مصر قريب حروح ازورة واتفرج عليه

ايام الدراسه في المعهد كان الواحد مروق مكنش فيه مشاكل مكنش فيه مسؤليه , لكن الان مسئوليات وهموم وشغل وقلق مستمر , هي دي سنه الحياه بقي حنعمل ايه

علي كل حال نورت استاذي الفاضل وتحياتي ليك ونتمني وجودك معانا يكون مستمر

واهلا وسهلا بيك وسلملي علي اهل كوم حمادة الطيبيين , الكرمه , الجدعان

أهلا بيك يا احمد
طبعا وبلا نقاش كانت أحلى أيام أيام صلاح الدين والمعهد اللى فى الأستاد
وكل الذكريات الحلوه كانت فيه بس المعهد الجديد بصراحه محترم وكان نفسى احضر فيه
وربنا يوفقك يااااااااارب فى عملك وفى حياتك

أحمد سميح

اهلا بيك احمد منور المنتدى بين اخوانك واخواتك
وربنا يوفقك يارب وتشتغل بشهادتك
اختك من الجيل الجديد اسوو ^ــ^

mero

أكيد كلامك صح
وكل مكان فيه الكويس وفيه الوحش
لكن المعهد محترم منش موضوع مبنى او غيره
لكن بصراحه فيه ناس كويسه جدا ولو الكل يفكر فيه مش موضوع دراسه وهتنتهى وخلاص

لأن بصراحه دراسته شيقه جدا وانا عن نفسى اتعلمت كتير من الدراسه دى اه انا مش متميز فيه وزلا حاجه لكن الدراسه نفسها بتعلمنا حجات كتير فى حياتنا الخاصه وإزاى نتعامل مع مجتمعنا
التدريبات اللى كنا بنروحها
والله بجد اللى يحب الدراسه فيه هياخد خبره كبيره فى حياته
لكن طبعا فيه ناس مش بتفكر كدا تفكيرها كله فى الصحبه وازاى تقضى وقت سعيد فى المعهد
لكن لو يفكر صح يعمل كل ده وبجانب حبه لدراسته
بس انا عاوز أسألك على واحد فى الشئون
الأستاذ حمدى أبو عيانه مدير الشئون العامه
وكان ليه اسم تانى الأستاذ عبد الوانيس ابو عيانه
كان راجل قمة فى الأحترام وليا قصص معاه كتير هبقا احكيها فى وقت تانى
عموما ربنا يوفق الجميع يارب
ونصيحه حب الدراسه دى علشان هتنفعك أوى فى حياتك
والله الموفق


احمد سميح

والله العظيم أنا لما دخلت المعهد حسيت إني مخنوق وقرفان وإني مش هنفع فيه بس حضرت أول محاضره للدكتور ماهر الملاح بجد الراجل ده دماغه جامده قررت إني أبقي في حالي أحضر محاضراتي اللي أقدر أحضرها واللي ما أعرفش أحضره أنقله من أي حد وأهي ماشيه بس الشباب الجداد مافكرين نفسهم حاجه مش عارف أوصفها بجد شرب سجاير في المدرج وقلة أدب وحاجه تخنق ولو إتكلمت مع حد يحسسك انك بتشتمه بس هنعمل ايه ربنا يهديهم ويهديني أنا كمان .

AMR EL-NAKEEB

فكرتنى بالدكتور ماهر الملاح طبعا دكتور محترم جدا
مش هقولك ان الأجيال تغيرت ولا الكلام ده لكن فعلا ايامنا كان فيه كدا برضه بس بصراحه مش بالطريقه اللى انا بسمعها اليومين دول كان فيه عقل شويه
لكن فيه حاجه مهمه جدا
كل مكان فيه الكويس والوحش
ولك حق الأختيار
وربنا يوفقك ياااااااااااااارب