لا
حطيت صوابعي العشرة
منك يا الحبيب
في الشق
رفضت صوت الولد
يهتف يجيب الحق
وقلت مش نازل
ومش قايل
ومش يسقط
لحد ما طق
ولما مات الولد
دمك لدمه حن
قلبك لحلمه رق
وقلت أنزل وأشارك
وآخد بتار لولاد
ورفعت راسك واسمك
بين البلاد والعباد
قالوا حضارة سنين
بانت في غمضة عين
واتوحدوا القطرين
تاني بقولة "لأ"
والخلق وقفت في صفك
هتفت على دق دفك
رقص التاريخ من النشوة
ولحد بابك
زفك
إيه اللي صابك
تاني
خدني للقاك عنواني
وقلت أشوف العجب
لقيت "بتوع" ربنا
كذاب
وقال
مننا
فاسد
وغار من هنا
باعت دلاديله
ولقيتـــك أنت بنفســــك
واقف تغني له !!
وتقول شوية لدووووول
وتعيد شوية لدوووول
وكل من قال قوووووووول
صدقت واتخميت
جيتك تفرحني
بفرحك اتغميت
وفضلت أقولك كفاية
لحد ما اتشليت
وانت ولا معني
ولا راضي تسمعني
وكل ما اجرح في حسي
حسك بيوجعني
يا شيخ كفاية بقى
هو أنت متسلط
بتقول نعم للضلالي
ولكل تاجر دين
ولكل هتيف أراري
كذاب ليوم الدين
ولكل من قال معاكم
بسميطة وببيضتين
ع القهر قالوا هنشكر
وع الخداع حامدين
وأنت معاهم وراضي
باصم بصوتك وماضي
ضحكوا عليك بصحيح ،
ولا انت بتدادي
وتشوفها رايحة فين؟
قصر الكلام
دمي
وحق أبوي وأمي
وحق من خلق العباد
ما هاسيب في حقي شبر
دم اللي راح لو تراب عندك
حدايا تبر
وليها رب كريم قادر يسويها
وليها شهم أصيل قادر يعديها
وليها عندي السؤال
وعندك أنت الرد
هتقول معايا يا خال،
ولا هويت الصد؟
انا صوتي اسمك وسيرتك
وصوتي لاجلك
"ضد"
موضوع: لا 
الأربعاء 12 ديسمبر - 22:52
