كل ما أبدأ سنه دراسيه
تبقى عَزيمتي مِيَّه المِيَّه
تبقى إرادتي إراده حديد
لكن تِقلب معايه ب مَيَّه
****************
اقول لنفسي كفايه فَكسَنَه
وهَشِد حيلي لأخر السنه
وابص لحالي كده ف الأخر
وكأني كلمت غيري أنا
*****************
في الاول تبقى معايه وردي
ولافيش محاضره مني تعدي
اول بأول اخلص وانجز
وشويه شويه أبدأ اهدي
******************
أعدي محاضره اتنين تلاته
ويبدأ فيا داء التباته
ويبقى زي الهم عندي
واحس المنهج فيه غتاته
******************
واجي يا سيدي ليله الامتحان
قدام الورق زي الغلبان
وأقول يا رتني ويارتني
وملحقش أخلص ولا انام كمان
*******************
واروح الصبح حضور جسدي
مفيش حيويه تقولش جدي!!
ورجلي تقيله مش شيلاني
وهاين عليا اروح وامشي
********************
لحظه الامتحان جه وقتها
وأحل اسأله وأسيب نصها
او اكمل وألِف حبتين
وأسلم الورقه قبل وقتها
******************
ويجي يوم نتيجتي التمام
ناجح طبعا يا سلام
لكن يا كبدي معايا مجموع
ميدخلنيش حتى الحَمَام