قاعدة (1)
أبعد نقطه بالنسبالك
جوا الدايره...هيّا مكانك
ولأن أساسا ف الدايرة
هنا هو هناك
ف طبيعي تحس إنك عايش
بـ إتنين جواك
القاعدة (2)
كل أمّا تحس إن الصورة ..
مبقاش فيها مراكب سايرة ..
افتكر إنها اصلا كورة ..
وفي مسقط رأسي تبان دايرة ..
ف عشان كده لما بتتقفل ..
وتسد ف وشك مليون باب ..
من غير أسباب ...
متقولش الحظ اداني قفاه ..
و إنه طلع فالصو وألامونيا ..
الحظ يا عم اداك وشه ..
م الناحيه التانية من الدنيا..
القاعدة (3)
فرق السرعات جوه الدايره
بينك وما بين كل الماشيين
هوا اللي حيقدر يضمنلك
إن انتا تقابل ناس تانيين
القاعدة (4)
كل الطرق ف الكون...
بتلف على واسع....
ف مفيش نفر فاكر....
إزاي رجع أو لف...
شوف الإله حكمته....
ف الدايرة عامله إزاي....
و إزاي محجّمنا .....
من غير ما يعمل سقف....
القاعدة (5)
إزاى تعرف..
مين سابق مين جوه الدايرة..
و من فيها قطع أطول مشوار..
مش ممكن برضه اللي في ضهرك..
يطلع سابقك..
وانت اللي حمار؟
القاعدة (6)
الصدق الخالص.. خالص.....
والكدب المحبوك جداً....
عمرك ما حتعرف تعرف....
الفرق ما بين الإتنين....
إتنين بيلفوا ف دايرة......
و إتقابلوا ف نفس النقطة.....
مع إن ف أول لقطة....
كانو ماشيين ف إتجاهين...
القاعدة (7)
ف الدايره مفيش واحد بيتوه
غير اللي يقرر يوِقِف لف
ف اللفّة مفيش واحد مجروح
إلا أما آخرها بتلقاه خّف
ف خلاصة القول
عيش عرض و طول
و ما تخفشي من الموت م الخرابيش
حتخاف و توقّف لفّ...تموت
حتراهن و تكمّل
حتعيش
مصطفي أبراهيم :)