* نسخة حيوان فـ جسد بشرى
تفكيره فـ غاية الهمجيه
مفهومُه عن المرأه الأصلى
عَـدّى الأفكار البدائيه
مين قال إن جسدها سبيلك
علشان تشتهى كوز المايّه ؟!!
/ مسخ لانسان بنياب تعبان
يلدغ ف الرايحه وف الجايه
بيقرب ويحب يجرب
ويدوق عفه كل بنيه
فتلاقي البنت معديه
بتسابق خطاويها لخوفها
بتخاف من عينه تعريها
بتخاف من ايده لتقطفها
فبتمشي الباقي ف خطاويها
بتلم الفاضل ف كسوفها !!
* لو سكتت قالوا دى تستاهل
لو ردت مش متربيه
و كإن عليها ده شئ ساهل
يكسروا جواها الآدميه
وصلت بالبنت إنها فعلا
كرهت فطرتها الإنسيه
و أمانها خلاص مقتول عمدا
و الجانى موهـوب حريه
يا مرخّص فـ البنت كيانها
و شرفها متحرم ليها
و قيمتها عندك فـ جسدها
مستبيع أو بايع فيها
ربك غلاّها و عظّمها
و النعمه بتستهتر بيها
لو نخوه ده شئ معدوم عندك
و دكر دى يا دوبك فـ بطاقتك
صدقنى بنات أصغر منك
لو تعرف فى دروس فـ رجوله
كانت بسهوله حتديها !!
/ لو تحسب وتفكر فيها
حتلاقي ب ان الدين واجب
هتلف تلف وترجعلك
وف اختك هيتم الواجب
هتدوق ف مراره نفس الكاس
هتكون الفرجه لنفس الناس
وهيكسر روحك نفس الفاس
ويهد الباقي ف وجدانك
وهتفضل واقف ف مكانك
مش قادر انك تلحقها
وسوابقك تربط ف لسانك
واديهم ليها تسبّقها
فان كنت محرص تحميها
فبلاش م الاول تبدأها !!