كل سنة وانت طيب ياريس

من أحمد فؤاد نجم إلى حسني مبارك
سيدي الرئيس
في عيد ميلادك الكام وسبعين
كل سنة وأنت طيب
واحنا مش طيبين
...كل سنة وأنت حاكم
واحنا محكومين
واحنا مظلومين
واحنا متهانين
ويا ترى يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك - هاتفتكر مين وللا مين
في عيد ميلادك الكام وسبعين
بقول لك كلمتين
الأوله
شيلتنا طين
وهل تعلم أن النيل بقى رشاح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والاقتصاد سداح
والسرقة بقت كفاح
ومصر متاحة بس للسياح
وعرض البلد بقى مستباح
والتانية
ورتنا الويل
دا الخطوة في عهدك بقت ميل
والضحك بقى نواح وعويل
والكوسة
عارف الكوسة
ممكن أقولك فيها موواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز على المتعلمين
والأساتذة بقم دجالين
والقادة بقم طبال0
واديني في الهايف يا حبيب الملايين
والتالتة
عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسة مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين
والرابعة
أمن البلد بقى تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين
والخامسة
القطاع العام…. عام
والفساد…. ساد
وفي جتة بلدنا بيرعى
أفتكر لجنابك إيه وللا إيه
وكل ذكرى ليك بدمعة
آآآآآآآآه آآآآآآآآه
أنا كنت حالف ميت يمين
أكملهم لك تمنية وسبعين
بس هاكفيهم ورق منين
وكل سنة وأنت
واحنا طيبين

يا عم انت شكلك كده هتحبسنا ولا ايه
بلاش نتكلم في السياسه

كل سنه وهو طيب
ويعيش قد معاش ويفضل ف ىالحكم قاعد لنا

أبو تريكة كتب:: يا عم انت شكلك كده هتحبسنا ولا ايه
بلاش نتكلم في السياسه

ايه يا ابوتريكة مش عاجبك المقالة ولا ايه
وعيب اوي اللي انت بتقوله ده
انت المفروض راجل مثقف والكلام ده مايطلعش منك
خليه من ناس تانية مش فاهمة حاجة
وعالعموم شكرا علي مرورك

شكرا يازيزو علي مرورك

متشكرين علي الرد كريم
انا علي فكره مش كنت قاصد انا كنت بهزر والله

شكرا علي زوقك وردك ليا
بس كلامك لو حد قراه مش باين فيه هزار
انا كنت لازم ابين
وعالعموم مقبولة منك يا حبيبي
وانا مابزعلش من حد والله خالص مهما كان انتقاده ليا
ولازم اتقبل النقد من اي شخص
وعالعموم انا اسف لو فهمت غلط منك

شكرا كريم

شكرا ابو تريكة
بس انا حاسس انك زعلان لسه
لو زعلان والله ما ادخل المنتدي تاني
ده انا بدخل علي حسكم
حبيبي ابوتريكة

هههههههههههههه
حبيبي كريم انت عارف بس انا مخنوق شويه كده بس مش منك حبيبي انت يا كريم

اوك يا حبيب قلبي

شكرا كريم

جامدة دى
تسلم الايادى ياكيموو

» وانت غايب عنى وانت مش موجود
» انا اسف ياريس .... تانى
» كل سنة وانت
» كل سنه وانت طيب يا ....؟؟؟؟
» هيرو لاف... كل سنه وانت طيب