مش عارف بكتب ليه

مش عارف بكتب ليه
ولا فيه في دماغي الفكره
أنا بس بوقف زمني
أنا بس بخاف من بكره
أنا خايف بكره يجيني
وأنا قلبي لسه بيكره

مش عارف بكتب ليه
ولا فيه في دماغي دليل
أنا بس بوقف زمني
أنا عايش حالة ليل
أنا خايف بكره يجيني
وأنا ليلي وسواده طويل

مش عارف بكتب ليه
ولا ليه وقفت زماني
ولا عارف ليه أتأثرت أو ليه حسيت بجناني
حسيت بالوحدة في صحبة وبقيت بمحبة أناني

مش عارف بكتب ليه
ولا ليه نكدت أصحابي
"مش عارف" كلمة بتكدب ..وأكيد في سؤالي جوابي
بكتب علشان حسيت وفي لحظة بكل عذابي
حسيت بحياتي بتهرب حسيت بغباء احلامي
حسيت الدنيا بتكدب وفي لحظة خسرت سلامي

هحكي وأقولك ديتها وأفتكروا كل كلامي

أنا أصلي مسواش شيء
أنا أصلي دماغ وشعور
باشعر بحجات كدابة
ودماغي عـليها غرور
طول عمري دماغي بتغلب
مهما ماشعوري يثور

معلش كلامي مش واضح
مليان تعقيد وجنان
بتعلم أبقى بسيط
أو أنسى إن أنا فنان
مليان تراكيب ومشاعر
مليان أفراح أحزان
مليان هزات وطرب
مليان نغمات وألحان
والشعر في عقلي فكرة
مش قافية ولا أوزان
ياما أفكاري غلبتني
وكتبت بكل إيمان
موّت في عقلي الواقع
وسرحت في دنيا خيال
عايش بإيمان في الحب
عايش بطموح وآمال
والدنيا تلف وتقلب
وأنا حالي هو الحال
لسه مؤمن بالفكرة
لسه مؤمن بمثال
انسان مليان أحاسيس
مهما ما أتقال وأتقال
عايش بالقلب وبس
عايش بعواطفه وبس
عايش وكرامته دفنها
عايش علشان الأمس
عايش في حياته الهاديه
وكلامه مجرد همس
ها هايعيش ؟؟
حيلاقي في الدنيا حد معاه
هايكون إنسان ؟
ويكونله كيان
في شبابه وصباه
هيلاقي صديق
ويبادله الحب ....
ده بفرض لقاه ؟؟؟
لأ
لأ
حايموت بإيمانه وأحلامه
والدنيا حتجري قدامه
أفكار وفلوس وقلوب ونفوس
وحايكره عيشته وأيامه
حيموت
حيموت على قلبه الوحداني
وحيقتل بعده الإنساني
وحيشكي ويحكي وقلبه حيبكي
ودموعه حتغسل وجداني
فوقني ....
حسسني بجهلي ورعبني
ومصيره هددني وسحبني
وضميره بيصرخ وبيشرخ جوايا
هدني وغلبته وتعبني
وسألته وبكل وضوح
أقتل جوايا حنان الروح
أحيا بكرامتي وعقلي وبالمنطق
ولا أحيا أضمد في جروح
سكت الضمير
وأول مرة يقول سكت
سكت وعملي كده (؟؟)
وأنا ليه سألت؟؟
مش محتاجه للسؤال
مش محتاجة للماطلة
هو معنى راح أقوله
وسد ودنك لو تعبت
عايز تعيش ؟؟
سؤال ساذج ..
أقصد عايز تعيش مرتاح
شوف ..
لو حسيت بقلبك بينبض نبض غريب
والمشاعر أتسحبت وبسرعة ظهرت للحبيب
والدموع في عنيك بتغلب كبريائك
والآهات والأصيل والشروق والمغيب
أقف مكانك
حاكون شديد ومش حارحمك
وأستعد للمفاجأة
حاغيرك راح أصدمك
عايز تحبه وتحضنه
وفي دنيا تانيه تسكنوا
عايز إن كلمته يسمعك
ولو شاورت يتبعك
اقتل عواطفك... !!
أيوه زي ما سمعتها
كنت أغبي منك بس بأيدي قتلتها
موتها موتها ...
فضلت تحارب جوه قلبي غلبتها
ولما جريت تستخبى سجنتها
ومسكت سكينة العقول
ونزلت أدبح قلبها
موتي يا عواطفي ...
موتي وأنا كلي إيمان لأعيش من غيرك
موتي وأنسحبي ,أوعي زمان يشغل تفكيرك
أنا مبقتش زي زمان
أنا دلوقتي مش إنسان
حتى الشعر وزجلي وفني
مش راح يفضل زي ما كان
بعد ماهتموتي دلوقتي
حانسى خلاص إن أنا فنان
صرخت ...
هزتني ورعبتني
ومش حاقولك فكرتني
بالليالي والمشاعر لأ
وعدتني بالسكوت وقالتلي ..
سيني أعيش ومش رح أحسم يوم قرارك
أنسى ليلك أنت حر .. عيش نهارك
سيبني أعيش وأوعدك .. مش حاكون أسباب مرارك
أسكتي ...
لسه حاتكدبي وتألفي
وتوعديني وتخلفي
هو موتك وبايدي راح أقتلك
أوعى أيدك ,,’’’’’’’’’’ قلت سبني
أوعى يابني ..
متبقاش غبي ...
قلتلك حاقتلها وحادفنها ,,
وحاعيشك من غيرها
وتغور وحاشتها وحلاوتها
ويغور شرها ويغور خيرها
رد ضميري بصوت مكسور
عايز تطفي في قلبي النور
أوعى توتها لتموت
وأوعى تعيش لحسن تقتلها
سيبها تعيش جواك ومعاك
وأفضل أشكيلها وأحكيلها
لسه بأيدي ماسك سكينتي
حتى الإيد التانية بتاعتي
والمشهد ثابت وغريب والصرخة .......
صرختها عاطفتي ؟؟