الحنين للذكريات

الحنين للذكريات .. ركبني قطر !!
أسجل عنوان المحطة .. وأحطّ سطر.
دفتر محطاتْ
كلّ اللي فاتْ.
محطات كبيرة ...
الوقفه فيها لازم تِطول !!
ومحطة خطف ...
القطر هدى.. ومشي علطول !!
مفارق تطوّل ..
ومفارق تحوّل.
أوعى تكون راكب مستني محطة تجيلك مرتين ...
دا أنتَ راكب مش من حقك يعرف حتى حينزل فين ؟!
أنت بتكتب الليّ بيحصل ..
اللي بيركب والليّ بيوصل !!
ياما عذبنا الفُراق ..
وياما أتمنيته ميمشيش ..
ياما أترجيته ميقفش ..
محطة كئيبه متهديش !!
لكنْ القطر ؛
مهما استنى عليك ..
بيعديّ
ومهما استعجلته
بيهديّ
تلفى محطه في وسط الناس والنور والصحبه
وتلقى محطه في نفق الضلمه الوحشه الصعبه
مش حتخلد ...
ولا حتموت !!
مسير القطر يقوم ويصفر ويقول تــوت !
وأنتَ تسجّل إن محطه خلاص بتفوت..
نقطة (.) وسطر _________________
أهو ده الحنين للذكريات ؛
محطات .. وقطر.
.....................................