قالوا شباب وطايش

قالوا شباب وطايش…مهلوس وسكران

عميل دول معاديه …يهود وامريكان

بينفذ المخطط ..كأنه قطيع خرفان

ولا يفهم فى السياسه ولا يعرف الإخوان

شباب خايب وفاشل مغرور ..كمان فسدان

ده متآمر ومندس ومتسيب وفلتان

خرج فى الشوارع واتمركز ف الميدان

عايز يطيح بالريس ويفكك الاوطان

عايز يقوم بثوره تقلب تاريخ وكيان

بتخيلات طفوليه انه هايظهر…يبان

تمرد بتاع مراهقه … سجين على السجان

شوية غضب مش اكثر من زوبعه ف فنجان

طلع الشباب الواعى ومعاه غضب وطوفان

خرج يقول بقوه …انا باعلن العصيان

على نظام الدوله الفاسد ..العريان

و كل الشعب يهتف ثائر كما البركان

صارخ من كل قلبه طاغى كما الفيضان

صوره حضاريه جدااااا …تبهر الأذهان

ملحمه شعبيه..على الظلم والطغيان

اعظم لوحه جداريه مرسومه فوق حيطان

امتزاج بين الثقافه والفكر والاديان

تحت عبائه واحده ….بتلهب الوجدان

بصوت عالى يهز حجارة الجدران

عشتى يا مصر حره …على مر الأزمان

مظاهرات سلميه …..سلميه مهماً كان

الامن المركزى واقف بسواد كما غربان

وبكل غضب وغباوه تتكلم العصيان

فوق الرؤوس تفتحها وتتفجر الالوان

احمر يالون الدم بتصبغ الميدان

وتسيل على الوشوش ..رجال ..بنات ..شبان

سلاح فى يد شرطى …كأنه مش انسان..!!

وبدا الرصاص يترش من يد كل جبان

لصدور جبال الغد يحصد بلا عنوان

الا ندالة وخسه …..ووطن مبقاش ف أمان

خنقوهم…وقتلوهم …بقنابل الدخان

اتفتحت السجون والضابط …السجان

هرب المساجين ….خرجوا بلا إستئذان

انطلقوا على البيوت …وبلطجه وعدوان

محاولات رخيصه لنظام ..مريض عيان

عايش فى عصر الجاهليه فارسل الفرسان

راكبين جمال وخيول زحفوا على الميدان

وارسلوا الهتيفه بتوع الحزب ال كان

واتحولت الساحه لحرب …وشغل جنان

بيحدفوا الحجاره …فى اتنفاضة الجرذان

نهار يمر وليل…تزداد سعرة الحيوان

بنهم …وجشع وخسه …بيحصد بشر ..جعان

لا بيشبع من الشهداء…..ولو تملاء الدماء فدان

ايد البطش طايله …تحصد .. بلا أثمان..!!

هم دول المؤيدين…لنظام عليل فسدان..!!

هم دول المهللين…لريس وحزب جبان…!!

مش برضو ال قتلوا خالد ومحمد البطران؟؟

وياما ذبحوا فى البشر وياما عملوا زماااان؟؟

لكن شباب بلدنا..خلوهم يجروا كما الفيران

وادى شعار البلطجيه…الجرى للجدعان

آه دى شلة الحراميه….سقونا العذاب الوان

سممونا….وسمعونا ياما كلام خيبان

يمرضونا ويشحتوا علينا…. لجل نبان

شعب عايش عواله …جاهل.. مطاطى وجبان

يبوس ايادى الدوله….عايش على الاحسان

شعب ياكل ما يشبع…وللذل إستكان

لكن الحقيقه كانت مسيرها فيوم تبان

احنا المصريين وياما كتب عنا الزمان

عن نهضة وحضاره راقيه ووحدة الاوطان

لو كنا كثير صبرنا …خلاص آن الاوان

نقف فى وش الظالم …نقول كفايه إمتهان

لا احنا عبيد ولا مماليك …خلاص انطلق اللسان

وقال حريه…عداله …وحق وكرامة الانسان

هانهزم بروحنا خوفنا …..وهانقهر الأحزان

ومصر الغاليه حره ….ولآخر الزمان….

ثورتنا ثورة أمه ….انتفاضة للأوطان

زمن الفساد ده ولى…وماعدش له بينا مكان

تسلم ايدك بجد هايل

جامد جوبا هسلم ي مان

جميل تسلم

نودى ايمن يويا

منورين ديما

شكرا ع المرور

جميله جدا احمد تسلم الايادى

» قالوا بعد المباراة
» قالوا عن الحب ...
» اجمل ما قالوا عن الحب
» قالوا علينا ديابه
» اجمل ما قالوا عن الحب