أنا بفضل دايما للأخر
ف جيمات الكونكان والشايب
و ف كشف الحاضر والغايب
وف حجز شقق مصيف بلطيم
أنا اخر تايب في اصحابي
واخرهم ف الصلا ف التسليم
وف دور المدرسه في التطعيم
وفي وقت السين
أنا اخر جيم
أنا جرح قديم...كان متغطي
إكمني مشتي ولابس كم
سبتني الدنيا بستين أم
وسبتلها ميت مله ودين
ولحد ماتميت ست سنين
أنا كنت بحب البني ادمين
وكرهت الناس من بعديها
علشان نسّوني أنا اصلا مين
مش فاكر امتى حقيقي بدأت
انما فيه فتره فاكرها طشاش
كان فنجان قهوتي مابيفضاش
وبكلم ربنا طول الوقت
عمري ماصدقت بنات غير مرمر
ويمكن دلوقتي ما اصدقهاش
أخر مره
شفتها فيها
كانت تقريبا بتعزل
و كان فيه سواق تاكسي منزل
ف شنط ناس حتحل مكانها
ووشوش بني ادمين معرفهاش
أنا مرمر يمكن كانت قدي
أيامها... لكن دلوقتي أصغر
عارفه إن أنا يوميا بكبر ؟
وبعجز اكمني مابنساش
أنا فاكر أيام بالميللي
أنا فاكر أيام بالتفصيل
أنا فاكر يوم دفنة اخويا
حتصدقي..؟ أكتر مافاكره
وساعات بنسي ف ليله كبيره
أنا فاكر شقة قصرالنيل
ومش فاكر حد من السكان
من صغري وعمري مابنسي مكان
أنا أصلا فاكر بيت شادي
مع إني مازورتوش غير مره
بأمارة فيه برواز بره
كان جواه صورته ف اعدادي
كان لسه ساعتها طالعله شنب
ونا حاسس إني طلعلي أتب
من تقل الشيله و م التفكير
معلش أنا آسف برغي كتير
وبسف وقتك وفي وقتي
أنا حاسس بدماغي بتتقل
أنا نفسي أنام
أنا عاوز اروّح دلوقتي
متشكر جدا ع الجلسه
حنكمل امتى علاج طيب ؟
لازم حنشوف بعض قريب
أنا ماشي...
سلام
موضوع: حوار مع دكتور نفسى 
الأحد 5 فبراير - 22:17
