دمنهورى وافتخر تعااااااااااااالى لقضاك

بسم الله الرحمن الرحيم

السلام عليكم ورحمه الله

كما تعودنا دئماً

نضع صديق واخ وعضو مثالي او مشرف تحت طائل اسئله الاعضاء

وويل من الاسئله التي يجد فيها من هو على الكرسي هذا نفسه

ونرى مدى ذكاء العضو في المراوخه واالصراحه

وكل من سبق كانوا نعم الاختيار ونعم الاجوبه

فالآن معنا على كرسي الاعتراف عضو غير عادى
انسان مثقف جدا سياسى من الدرجه الاولى
عدو للاخوان هههههه
استفادنا واتعلمنا منه كتير انا شخصيا بحب اقرأ مواضيعه وردوده للاستفاده من وعيه الثقافى
شخص كلامه منطقى جدا ومقنع
وطبعا منعرفش اى حاجه عنه ولا حتى اسمه الحقيقى وانهارده انا بستضيفه معانا ع الكرسى عشان نعرف مين هو الشخص ده
هو عضو بحراوى دمنهورى والفخر له بأنتمائه لبلده ولنا بأنتمائه معنا

معنا ومعكم العضو

[ندعوك للتسجيل في المنتدى أو التعريف بنفسك لمعاينة هذه الصورة] دمنهــــــورى وافتخـــــــــر

[ندعوك للتسجيل في المنتدى أو التعريف بنفسك لمعاينة هذه الصورة]

واتمنى ان يلقى في هذا المكان الراحه

وابدا انا الاسئله التقليديه

بطاقتك الشخصيه دمنهورى ..

الاسم
السن
العنوان
المؤهل الدراسى
مهنتك
الحاله الاجتماعيه
عندك كام اخ واخت
ترتيبك الكام بين اخواتك
هوايتك

وواخر سؤال من انت ؟؟؟
يعنى اكتب اى حاجه تعبر بيها عن شخصيتك كلمات قليله ولكن تعبر عن شخصيه دمنهورى وافتخر

ولسه طبعا اسألتى ليك مخلصتش لكن حسيبك للاعضاء وارجعلك بمجموعه اسئله تانيه

تحياتــــــــــــــــى
فـــــريسكـــــــــــا

تسلمي ع الاختيار وبجد دمنهوري انسان محترم جدا جدا وبصراحه انا بحترم كلامه اوي وبحسه اد ايه كلامه عاقل وموزون انا معرفكش كتير صراحه بس ف المده اللي شوفت توبيكاتك وردودك ارتحتلك جدا ومنور الكرسي والله يكون ف عونك
انا حبيت بس ارحب بيك الاول وبعدين نسئل كمان شويه كده

نورت دمنهور كرسى الاعتراف ويارب تكون مبسوط وانتا قاعد على الكرسى وتستمتع بالاسئله الحلوه بقى راجع تانى

منور ياادمنهورى الكرسى يااارب اسبوع خفيف عليك كده
وندخل فى الجد عطوووووول

عرفنى مين هو دمنهورى وافتخر فى سطرين؟

ليه اخترت النيم دااا ؟

نرجع شويه للذكريااات واحكلنااا عن اصعب موقف مريت بيه فى مراهقتك ؟ وكان رد فعل والدك ايه
ايه اكتر حاجه كنت بتحبهاا وانت طفل ؟
اوصف لينااا شعورك وانت رايح المدرسه اوول يوم ومين كان معاك بيوصلك؟

نطلع شويه للمستقبل
شااايف حياتك رايحه على فين؟
ناااوى تربى اولادك بنفس اسلوب ولدك ولا لاء وليه ؟
معترف ومؤمن بعمل المرأه ولا لا؟
نخلينا شويه بقااا فى الحااضر

حاليااا
انت راضى على نفسك ؟
تقدر تقووول ايه هى عيوب دمنهورى ؟
اكتر حاجه بتحبها فى الناس ؟
ههههههههههههه وكفايه كده هرجع تاااااانى تكون لفيت الازمنه دى ماضى حاضر مستقبل ههههههههههه اى خدعه
منور يادمنهورى

خد حبه الاسئله ديه بقا يامعلم استلم

من هم الأعضاء اللي تتمنى تشوفهم؟
من العضو اللي تحب يضيفك لقائمة الأصدقاء ؟
رأيك بـ الصداقـه بيـن البنت والولد؟
عضو عاجبتك صورته الشخصيه وتوقيعه ولية؟-عضو نشيط... ؟
عضو مفقود... ؟
عضو واثق من نفسه؟
عضو داخل مزاجك
عضو نفسك تغير اسمه ؟
عضو نفسك تضربة ومدايقك ؟
عضو نفسك تقول له ( برافو عليك )
خمس اعضاء تتمني تواجدهم لما تدخل المنتدي؟

كفايه دول نكمل بعدين بقا

السلام عليكم ورحمته وبركاته

اشكرك فريسكا علي المقدمة الجميله دي ,اللي انا مستحقهاش

واشكر كل اخواتي الاعضاء علي تفاعلهم وأهتمامهم

وأشكرهم علي اسئلتهم واتمني اني اقدر اجاوب علي كل الاسئله ان شاء الله

وسعيد بوجودي معاكم في منتدانا الغالي

واتمني اكون ضيف خفيف عليكم

ابدأ اجاوب علي الاسئله وربنا يستر

بسم الله

الاسم \ أحــــــــــــــمــــد

السن \ 25 سنة

العنوان \ مدينه دمنهور , حاليا مقيم خارج مصر

المؤهل الدراسى \ بكالوريوس الخدمة الاجتماعيه

الحاله الاجتماعيه \ مرتبط

عندك كام اخ واخت \ أخ واحد و أخت واحدة

ترتيبك الكام بين اخواتك \ الأخيـــــر

هوايتك
القراءة , المشي , ( المنتـــــــــدي , فيس , تويتر , بالتوك )

وواخر سؤال من انت ؟؟؟
يعنى اكتب اى حاجه تعبر بيها عن شخصيتك كلمات قليله ولكن تعبر عن شخصيه دمنهورى وافتخر

انسان عادي , فقير الذكاء , ابحث عن المدينه الفاضله ,لأعيش فيها , لأبعد عن الحقد والكذب والخداع البشري ,, أعيش محاصر بين مطرقه الوحدة وسندان الحيرة , اتمني ان يتمتع كل البشر بالعدل والخير , اتمني ان يموت الفقر ويقتل المرض , ويعيش كل البشر سعداء بلا تمييز وبلا تفرقه

الله دى فى عصير
ههههههههههههههههههههههههههههههههه
امنور دمنهورى
وربنا يكرمك وتحقق كل ما تتمناة امين يارب

ssAsO كتب:: منور ياادمنهورى الكرسى يااارب اسبوع خفيف عليك كده
وندخل فى الجد عطوووووول

عرفنى مين هو دمنهورى وافتخر فى سطرين؟

انسان عـــــــــــــــــــــــادي و فقـــــــــــــــــــــــــــير الذكاء , لكن بتمني
أن كل البشـــــــــــــــر تتمــــــــــــــــتع بالعــــــــــــــــــــــــــــــدل والخير ,

ليه اخترت النيم دااا ؟

ليه اخترت النيم دة , أجاوبك كان ليا اصحاب في المعهد زمان من نفس بلدي دمنهور كان اي حد يسئلهم انتم منين يقولوا احنا من اسكندرية , انا كنت بستغرب من ردهم ليه بيستعروا من بلدهم ,, ليه بيستعروا من دمنهور !!!
ولما سافرت اتعرفت علي زميل ليا في الشغل من رشيد بس اي حد يسئله انت منين من مصر يقول انا من اسكندرية ,, بردوا بقيت مستغرب !! ليه هو مستعر من بلدة ليه مكسوف يقول اسم بلدة

بالرغم ان اي حد بيسئلني انت منين بقوله انا من دمنهور عادي جدااااااااااا
مينفعش اني استعر من بلدي , لان دمنهور عندي اغلي من الف اسكندرية
وانا فخور اني منها عشان كدة سميت نفسي دمنهوري وافتخر

نرجع شويه للذكريااات واحكلنااا عن اصعب موقف مريت بيه فى مراهقتك ؟ وكان رد فعل والدك ايه

فترة المراهقة بتاعتي كانت كلها مصايب وبلاوي , بس انا حقول موقف خفيف كدة , عشان المواقف التانيه مينفعش تتقال !!!!

كنت في الاعدادي وكنت بشوف اخويا الاكبر مني بيشرب سجاير , فقلت لازم أجرب , وجربت فعلا وشربت اول سجارة في حياتي ,, المهم أبويا عـــــــــــرف ,, معرفش ازاي !! و رزعني يوميها حته علقه , وبالصدفة عمامي كانوا عندنا في البيت وبقت فضيحتي بجلاجل والعيله كلها عرفت ,

ايه اكتر حاجه كنت بتحبهاا وانت طفل ؟

كنت بعشق الكرتون , توم أند جيري و كابتن ماجد و سلاحف النينجا و باور رينجرز و و و إلخ

اوصف لينااا شعورك وانت رايح المدرسه اوول يوم ومين كان معاك بيوصلك؟

كنت طهقان وزهقااااان عشان مكنتش بحب الصحيان بدري في الشتا , بس كانت ايام جميله ,,, كانت معايا أمي

نطلع شويه للمستقبل
شااايف حياتك رايحه على فين؟

دايما بسئل نفسي السؤال دة ومش بلاقي أي اجابه الصراحة

ناااوى تربى اولادك بنفس اسلوب ولدك ولا لاء وليه ؟

مستحيل , أربي اولادي بنفس طريقة ابويا ,
لاني شايف انها طريقة مش ناجحة

معترف ومؤمن بعمل المرأه ولا لا؟

أكيد , واي انسان مش معترف بأهمية المراه واهمية عملها يبقي جاهل , للاسف الثقافه العربية الغبية بتاعتنا قللت من دور المرأه , بالرغم اني بشوف ان المراه ناجحه جدا في اي موقع بتشتغل فيه , عندها مميزات مش عند الراجل مثلا المراه قويه الملاحظة وبتهتم بالتفاصيل صبورة جدا , الراجل لاء ,, ذاكره المرأه اقوي من ذاكرة الرجل وكمان نسب الذكاء اعلي بس مش قاعدة

نخلينا شويه بقااا فى الحااضر

حاليااا
انت راضى على نفسك ؟
الحمد لله

تقدر تقووول ايه هى عيوب دمنهورى ؟

عيوبي كتير جداااااااااااااااااااا , بس اهم العيوب التردد و سعات مش بكون حاسم في قراراتي , مش منظم ,,طبعا في عيوب تانيه كتيير بس دول اهم العيوب

اكتر حاجه بتحبها فى الناس ؟
مفيش حاجة معينه , بس ممكن احب الدوشة بتاعه الناس عشان بتحسسني اني مش لوحدي في الدنيا
ههههههههههههه وكفايه كده هرجع تاااااانى تكون لفيت الازمنه دى ماضى حاضر مستقبل ههههههههههه اى خدعه
منور يادمنهورى

[font:8cdf=]

مشـــــــــــكورة يا ساسو علي مرورك وعلي الاسئله
وشـــــــــرفتي ونــــــــــــــورتي التوبيك

for ever كتب:: خد حبه الاسئله ديه بقا يامعلم استلم

من هم الأعضاء اللي تتمنى تشوفهم؟

كل اعضاء المنتدي
من العضو اللي تحب يضيفك لقائمة الأصدقاء ؟
اي عضو عاوز يضفني أكيد دة شئ يشرفني
رأيك بـ الصداقـه بيـن البنت والولد؟

رأي ان الصداقه بين البنت والولد شئ طبيعي جدا , طالما الطرفين ملتزمين بحدود معينه يبقي مفيش مشكله , يعني الزماله ليها حدود والصداقه ليها حدود وهكذا , يعني طالما في حدود بتحكم العلاقه يبقي مفيش اي مشكله , واكيد الانسان بشكل عام هو اللي بيختار أصدقاءه , وطالما فيه اختيار يبقي فيه حريه
دة معناه ان الصداقه هي حريه شخصية

عضو عاجبتك صورته الشخصيه وتوقيعه ولية؟-عضو نشيط... ؟
والله كل الاعضاء صورهم حلوة وتواقيعهم احلي ,,,.انت عضو نشيط يا فور ايفر

عضو مفقود... ؟

جوبا مش عارف فين بقاله كام يوم مستخبي

عضو واثق من نفسه
كل الاعضاء
عضو داخل مزاجك
!!؟؟
عضو نفسك تغير اسمه
كل الاسماء حلوة الحمد لله هههههه
عضو نفسك تضربة ومدايقك
لا مفيش الحمد لله

عضو نفسك تقول له ( برافو عليك )

لكل الاعضاء اللي بيدخلوا المنتدي بأستمرار

خمس اعضاء تتمني تواجدهم لما تدخل المنتدي؟
اتمني كل اعضاء المنتدي يكونوا متواجدين

كفايه دول نكمل بعدين بقا

مشـــــــــــــكور يا فـــــــــور ايـــــــــــفر علي مرورك وعلي الاسئله
شرفتنـــــــي ونورتنــــــــي يا غالي بمرورك الكريم

وسامحني اذا كنت معرفتش اجاوب كويس ,
لان بصراحة النوع دة من الاسئله مش بعرف اجاوب عليه كويس

for ever كتب:: تسلمي ع الاختيار وبجد دمنهوري انسان محترم جدا جدا وبصراحه انا بحترم كلامه اوي وبحسه اد ايه كلامه عاقل وموزون انا معرفكش كتير صراحه بس ف المده اللي شوفت توبيكاتك وردودك ارتحتلك جدا ومنور الكرسي والله يكون ف عونك
انا حبيت بس ارحب بيك الاول وبعدين نسئل كمان شويه كده

حبيبي فور ايفر دة من زوقك والله وكلامك كتير اوي عليا

الصراحة انت انسان محترم جدا واخلاقك عاليه جدا وبتفكر في
طفله صغيرة مريضة

دة يدل علي انك انسان نبيل ويدل علي حسن أخلاقك ورجولتك

بجد أنا بحترمك جدا وبحترم تفكيرك ,

وبشوف انك مخلص للمنتدي بشكل كبير , وشئ جميل لما الانسان يبقي مخلص للشئ اللي بيحبه او للشئ اللي مهتم بيه

لك مني كل التحية والتقدير والاحترام يا اخي العزيز الغالي

نم نم كتب:: الله دى فى عصير
ههههههههههههههههههههههههههههههههه
امنور دمنهورى
وربنا يكرمك وتحقق كل ما تتمناة امين يارب

نمــــــــــــــــــــــــــــــــنم باشا اهلا بيك يا غالي
منور التوبيك والله العظيم

ربنا يخليك يا حبيبي وتحقق كل احلامك انت كمان ان شاء الله

وكل سنة وانت طيب ورمضاااااااااان كريم عليك يا غالي ,

hero love كتب:: نورت دمنهور كرسى الاعتراف ويارب تكون مبسوط وانتا قاعد على الكرسى وتستمتع بالاسئله الحلوه بقى راجع تانى

الله يخليك يا جميل , اكيد انا مبسوط عشان موجود معاكم

وشرفتني ونورتني بمرورك الكريم يا غالي

ربنا يوفقك دمنهوري ويارب نكون خفاف عليك
ولينا اسئله ان شاء الله

ايه ياجماعه مالكم كده مش عاملين الواجب مع دمنهوري ليه ده الكرسي بتاعه مرتاح اوي مش عاوزين راحه يابشر [ندعوك للتسجيل في المنتدى أو التعريف بنفسك لمعاينة هذه الصورة]

خد حبه اسئله كده ع الماشي

ايه اكتر كلمه بتحب تسمعها من والدك ووالدتك؟

ايه الموقف اللي حصل قبل كده ف حياتك وعمرك متنساه ابدا؟

نفسك ف ايه بصراحه ف اللحظه ديه؟

لو فضلوك بين المال والصحه والسعاده تختار ايه؟

اعترف تليفونك ف رصيد اد ايه ده انا هسيحلك هنا [ندعوك للتسجيل في المنتدى أو التعريف بنفسك لمعاينة هذه الصورة]؟

كفايا كده عليك

دمنهورى وافتخر حسألك مجموعه من الاسئله ف 3 فئات سياسيه عاطفيه اجتماعيه

والمرادى حسألك ف السياسه
1/ اديت صوتك لمين ف انتخابات الرئاسه
2/ لو رجع الزمن وكانت الانتخابات بين 5 شخصيات حتختار مين
جمال عبد الناصر* السادات* حمدين صباحى* ابو الفتوح* واخيرا الرئيس الحالى محمد مرسى
حاجه خياليه شويه بس حابه اسألك برده وسبب اختيارك للشخصيه اللى المفروض انك حتنتخبها
3/ايه رأيك فى اداء الرئيس محمد مرسى
4/ من وجهة نظرك انت شايف ان مرسى عنده خبره سياسيه كافيه
5/ تعتقد ان لو احمد شفيق كان فاز ف الانتخابات كان حيبقى اداءه افضل من اداء مرسى
6/ تعتقد ان حمدين صباحى ممكن يفوز لو رشح نفسه ف الانتخابات القادمه وخصوصا بعد ماوقف ضد مرسى والاخوان وبعض الناس اخدت منه موقف وقالت انه منافق
7/ شايف البلد ازاى ف ال4 سنين الجايه
8/ كنت تتمنى مين يتولى منصب رئيس وزراء ونائب الرئيس
9/ ما رأيك فى كل من (مع الاحتفاظ بالالقاب لكل شخصيه حذكر اسمها)
اردوغان
اوباما
البرادعى
مبارك
خالد على (المرشح السابق للرئاسه) اصله موش مشهور اوى
محمود سعد
عمرو اديب
توفيق عكاشه
منى الشاذلى
عمرو الليثى
عمرو موسى
حمدين صباحى
عبد المنعم ابو الفتوح
واخيرا محمد مرسى
واتمنى مكونش تقلت عليك بالاسئله

yousef كتب:: ربنا يوفقك دمنهوري ويارب نكون خفاف عليك
ولينا اسئله ان شاء الله

الله يخليك يا يوسف يا حبيبي نورت وشرفت التوبيك بمرورك الكريم

وكل سنة وانت طيب ورمضان كريم عليك

for ever كتب:: ايه ياجماعه مالكم كده مش عاملين الواجب مع دمنهوري ليه ده الكرسي بتاعه مرتاح اوي مش عاوزين راحه يابشر [ندعوك للتسجيل في المنتدى أو التعريف بنفسك لمعاينة هذه الصورة]

ههههههههههههه خليك فاكرها يا فور ايفر
مردودة ليك في يوم من الايام هههههههههههههههههه
لا ولا يهمك اسئلتك مميزة وكل شئ يجي منك حلو , تحياتي ليك

خد حبه اسئله كده ع الماشي

ايه اكتر كلمه بتحب تسمعها من والدك ووالدتك؟

لما يدعولي

ايه الموقف اللي حصل قبل كده ف حياتك وعمرك متنساه ابدا؟

زعلت مرة مع اخويا الكبير ومش حنسي ابدا الموقف دة

نفسك ف ايه بصراحه ف اللحظه ديه؟
نفسي اشوف أبويا وأمي
لو فضلوك بين المال والصحه والسعاده تختار ايه؟
الصحة
اعترف تليفونك ف رصيد اد ايه ده انا هسيحلك هنا [ندعوك للتسجيل في المنتدى أو التعريف بنفسك لمعاينة هذه الصورة]؟

هههههههههههههه ولا يهمك فيه حوالي 18 , بس مش بالجنيه
,, تحب احولك رصيد هههههههههههههه

[font:cd58=][font:cd58=][font:cd58=][font:cd58=]

وشرفت ونورت بمرورك يا فور ايفر باشا

فريسكا كتب:: دمنهورى وافتخر حسألك مجموعه من الاسئله ف 3 فئات سياسيه عاطفيه اجتماعيه

والمرادى حسألك ف السياسه
1/ اديت صوتك لمين ف انتخابات الرئاسه

والله للاسف معرفتش انتخب مكنش عندي وقت خالص وكمان السفارة بعيدة عني جدا , لكن كنت مؤيد حمدين صباحي واتصلت بأهلي واخواتي وقلتلهم انتخبوا حمدين , انتخابات الاعادة كنت اقدر اروح انتخب بس انا مش بحب شفيق ولا بحب مرسي فقاطعت

2/ لو رجع الزمن وكانت الانتخابات بين 5 شخصيات حتختار مين
جمال عبد الناصر* السادات* حمدين صباحى* ابو الفتوح* واخيرا الرئيس الحالى محمد مرسى
حاجه خياليه شويه بس حابه اسألك برده وسبب اختيارك للشخصيه اللى المفروض انك حتنتخبها

طيب بما ان السؤال فيه جزء خيالي

لازم الاجابه تكون فيها جزء خيالي بردة , لو فرضنا ان السادات بعــــــــــث من جديد

ورشح نفسه في الانتخابات , انا حنتخبه ولما يفوز ويبقي رئيس ,حيرجع السلفيين والاخوان تاني للسجن , لان الجماعات الاسلاميه هيا اللي قتلت السادات قبل كدة , وشئ كويس انه يرجع الاخوان والسلفيين للسجن , لان الاخوان والسلفيين لم يفيدوا الاسلام بالعكس أضروا الاسلام اكثر بأفكارهم وسياستهم الغبية

الميزة التانيه للرئيس السادات انه راجل سياسي محنك ,

والسادات يقدر يرجع الهيبة والكرامه للشعب وللدوله مره تانيه بسهوله , لانه كان راجل حازم جدا وشجاع
واعتقد ان اغلب مشاكل البلد السادات يقدر يحلها

3/ايه رأيك فى اداء الرئيس محمد مرسى

سئ ,لم يفعل شئ يذكر إلا انه كلم الرئيس البشير وافرج عن الصحفية المصرية اللي كانت مسجونه في السودان غير كدة لم يفعل اي شئ يذكر !!!
ومازال احمد الجيزاوي مسجون ينتظر المحاكمة ومرسي لم يفعل شئ

4/ من وجهة نظرك انت شايف ان مرسى عنده خبره سياسيه كافيه

لاء , ورربنا يستر علي مصر , منه ومن جماعته ومن ولاد عمه السلفيين

5/ تعتقد ان لو احمد شفيق كان فاز ف الانتخابات كان حيبقى اداءه افضل من اداء مرسى

للاسف الاتنين أسوء من بعض , بس اتمني من كل قلبي ان مرسي ينجح ويقدر يعمل شئ عشان خاطر الشعب

6/ تعتقد ان حمدين صباحى ممكن يفوز لو رشح نفسه ف الانتخابات القادمه وخصوصا بعد ماوقف ضد مرسى والاخوان وبعض الناس اخدت منه موقف وقالت انه منافق

سواء الرئيس مرسي كمل الفترة بتاعته او لاء , فالناس عرفت مين اللي منافق الناس أتاكدت ان الاخوان هما اللي منافقين ,ورجعوا في كل وعدهم واهتمامهم الاول والاخير بمصالحهم , وإزاي يقعدوا أكبر وقت في السلطة
معتقدش ان حمدين صباحي منافق الراجل دة وطني ومش حرامي ومش بيتاجر بالدين زي الاخوان والسلفيين
اعتقد حينجح في الانتخابات القادمة لو ترشح , مع انه ناصري وان مش بحب التوجهات الاشتراكيه بس بالنسبالي حمدين احسن من الاخوان

7/ شايف البلد ازاى ف ال4 سنين الجايه

لو استمر الاخوان في السلطة , حيحتلوا في الاربع سنين الجايين كل المناصب المهمة في الدوله وحيحولوا الدوله المصرية إلـــــــــــــــــــــــي دوله إخوانجية , والمجلس العسكري من بعيد بيراقب ومنتظر في اقرب فرصه ينقض علي الشرعيه وياخد السلطة مرة تانيه , انا بالرغم اني ضد الاخوان لكن انا مع الشرعيه وبؤيد الرئيس المنتخب مع اني حاسس انه معملش أي شئ لغايه دلوقتي , بس انا مع الشرعيه بشكل عام , ومش احب ان الجيش يعمل انقلاب علي الشرعيه ويغتصب السلطة مرة تانيه

8/ كنت تتمنى مين يتولى منصب رئيس وزراء ونائب الرئيس

رئيس الوزراء أي حد يكون بيفهم في الاقتصاد بس ميكونش من الاخوان
نائب الرئيس اي حد يكون بيفهم في السياسة بس ميكونش من الاخوان

9/ ما رأيك فى كل من (مع الاحتفاظ بالالقاب لكل شخصيه حذكر اسمها)

اردوغان
رجل شريف وزكي وبيحب بلدة , وعمل عشان بلدة كتير

اوباما
منفذش وعودة تجاه الشعب الامريكي الي الان اري ان اوباما فشل في إدارته لامريكا بشكل كبير , امريكا مازالت تعاني من اثار الازمة الاقتصادية ,ونسبه البطاله مش قليله
البرادعى

كان يستطيع ان يقلب الثورة رأس علي عقب , ويجعل الثورة تسير في الاتجاه الصحيح لكنه تخازل عن القيام بدورة وخاف علي نفسه

مبارك
البقرة الضاحكة

خالد على (المرشح السابق للرئاسه) اصله موش مشهور اوى
ليه مرداش يتنازل ايام الانتخابات لصالح حمدين صباحي ,لو كان ابو الفتوح وخالد علي اتحدوا مع حمدين , اعتقد كان حيبقي افضل

محمود سعد
سعات بحس انه بوشيين

عمرو اديب
متحول ومنافق

توفيق عكاشه
محتاج يروح مستشفي المجانين ضروري

منى الشاذلى
بحس انها مسكت العصايه من النص ايام الثورة , موقفتش مع طرف ضد طرف
لحد المعركة متخلص والكسبان تؤيده

عمرو الليثى
بحترمه

عمرو موسى
فلول

حمدين صباحى
راجل ثوري محترم ومش حرامي ومش تاجر دين , ممتاز بكل المقاييس , عندة مشكله صغيرة انه ناصري اشتراكي , وانا مش بحب الافكار الاشتراكيه , بس احسن من الاخوان بردوا

عبد المنعم ابو الفتوح
دكتور محترم وثوري ومش حرامي و اخوانجي سابق
واخيرا محمد مرسى
رئيس الجمهوريه وليه كل الاحترام , لكن الي الان لم ينفذ وعودة , ولم يضيف اي جديد , لكن اتمني ان يستطيع يحل مشاكل مصر ويعبر بيها لبر الامان , ويكون ولاءه لمصر وليس للمرشد
واتمنى مكونش تقلت عليك بالاسئله

[font:8178=][][

شرفتـي ونورتـــي فريسكا وتـــسلم ايدك أسئله كتير أوي بس مميزة ومتنوعه

الف شكر ليك يادمنهوري
واتمنا انك تكون انبسط بالاسبوع ده

وبجد انت كنت ضيف عزيز جدا علينا

وشكرا ليك مره تانيه يادمنهوري

تم غلق التوبك
علشان العضو اللي بعده يتفضل ويقعد وينورنا

» اهلاوى وافتخر
» دمنهورى .....
» كل سنه وا نت طيب دمنهورى
» حصل خير (( دمنهورى ))
» يارب اكون فهمت قصدك با دمنهورى