تقول له فاكر .. يرد فاكرة
ورق التذاكر
ورق المذاكرة
كل الأغانى .. يعيدوها تانى
و هو فاكر .. و هى فاكرة
أول قصيدة فى جواب مكرمش
و كوبرى بنها و سميط مقرمش
يـحمّر وش الصبية فجأة
هو يسبّل .. هى تبربش
تقول له فاكر .. يرد فاكرة
برج الجزيرة و الناس طشاش
باينين كما نمل و فراش
الدنيا خليّت .. مافضلش غيرهم
قالت تبوسه .. قام قلبه باش
تقول له فاكر .. يرد فاكرة
و العود يرن الحنين فى قلبه
لمّا يحس ان هى جنبه
ع الفجر يدعه فى كل ليلة
يا رب كل البشر يحبّوا
تقول له فاكر .. يرد فاكرة
على شط جمصة ضاع منِّى صندل
على شط بحر المتاهة ضعت
و طعم بوسة فى قلبى حنضل
و رغم كل الوجع رجعت
عشان اغنى ...
أنا قلبى خردة مالهش قيمة
ياللى تحبى الحاجات قديمة
هدوم قديمة
يُفَط قديمة
جبنة قديمة
حواديت قديمة
تقريها فى جرايد قديمة
تلاقيها جوّه بيوت قديمة
خدى قلبى حتة أنتيكة نادرة
و قولى له فاكر ..
ح يرد فاكرة
موضوع: تقول له فاكر .. يرد فاكرة 
الخميس 6 سبتمبر - 14:34
