انا البنت اللى مرتبطتتش
بعيل توتو فـ الجامعه
وقالو دى ماشيه تتنّك
وطالعه فيها بزياده
ولو جه واد يقول حاجه
تقول عيد تانى مش سامعه
ولو تهته عليه تضحك
وفـ الآخر تقول خلصت يا حماده ؟!
وعايشه حياتها مرتاحه
بعيد عن اى اى بعاد
وواثقه فـ نفسها جدا
مبتكلمش اى ولاد
وييجى واد ويتتلكك
ويحجز كرسى جمبيها
ويعمل فيها واد طيب وبرده خجول
وييجى الحيله فـ الآخر
ويطلب منّها الكشكول
وهيا فـ سرّها فاهمه
وتتحجج عشان يمشى
ويجى بعده واد تانى
يقول معجب ومبنامشى
وهيا لا هيا فرفوره .. ولا غاويه
كلام تيمو
دى بنت مخلّصه جدا ومـ الآخر
على قديمه
لا ناقصه واد يقول مشتاق
ويعمل فيها جامد بس
وشايف نفسه سى السيد
ويتحكم فـ فعل ولبس
كإن الواد خلاص يعنى
مفيش منه
وعامل فيها ميت راجل
انا اللى يحبنى لازم يكون عاقل
يجيلى لحد باب البيت
ساعتها هقول يا ميت اهلا
انا موافقه وكمان حبيت
ده دول اصلا عيال فافى وبتجلجل
عشان انا فاهمه مـ الأول
انا البنت اللى مرتبطتش
وقضّت وقتها سينجل
موضوع: البنت السنجل 
الثلاثاء 16 يوليو - 5:05
