و لسه الصوره ف ايديا
بتضحكلى كل اما بصلها
و احوش الدمعه ف عنيى
لما افتكر ايامك بتفصلها
يا ضحكت عمرى ... اللى انطفت بدرى
نفيش حاجه توجعنى من بعدك
غير بعدك
بقيت اشوف كل العيال شبهك
وحشنى يا واد و ليه الغيب طول
انا ما بقتش زى الاول
وحشنى يا ضنا قلبى
يا وردة عمرى اللى بتفتح
و انطفت قبل المعاد
و اختارها ربنا و اختبرنا بالبعاد
و الليل ف الوحده بيجرح
بعدى كتير ع كليتك
و اشوف البنت اللى انت حبتها
و كنت مخبى ف الدرج صورتها
و كان وشك يجيب الوان لو تيجى سيرتها
و اشوف اصحابك و مكانك اللى بقا ساكت
و خرجاتك و سهرك كتير بالليل و حتى حججك الفرغة
خلاص كل الحاجات دى ماتت
زى اوضتك اللى مهما اقيد نورها بتفضل برضو مضفية
و اقول فين اغنيك اللى تحب تسمعها و القران اللى ع الصبحية
و لبسك اللى كنت شريه ... علشان تحضر بيه
اول يوم ف الكلية
خلاص كل الحاجات دى اتيتمت بعدك
دا حتى موبيلك سكت خالص مهنش عليه بعدك
و جهازك و كتباتك و قلمك اللى تحب تكتب بيه و اسرارك و و صورك
من بعدك اتيتمت حاجات كتير
دا حتى الضحكة و كلمة صباح الخير
كانها مخلوقه علشان انت اللى تقولها
اه يا ضنيا و اه يا دموعى ف الليالى بطولها
و بستناك تيجى باليل ع طول
و بستنى لكن انتظارى يطول
و بنام ف مكانى و بقوم الصبح مرعوب من الخضة
و ما اهداش الا لما اقوم اتوضى
و بدعى كتير ف صلواتى
فا تهدا دموعى و اهاتى
و احس بانى مطمن
و بستنى تبجى ف الحلم و ما بتجيش ... لكن برضو بستنى
اه يا ندل تنسى ابوك اكمنك يعنى ف الجنة
#احمد_حسوب
اهداء الى روحى محمد رضا
موضوع: و لسه الصوره ف ايديا 
الأحد 6 أكتوبر - 13:49
