كام انسان نفسه يتوب

خلاص... قررت أتوب
فحبيت بمبشيئة الله إنى أحاول أساعدك فى إنك تاخد القرار ده ، اللى هو بجد
أهم قرار فى حياتك
أهم من قرار جوازك بحد معين مثلا ، او قرار انك تشتغل فى مكان ما، أو إى قرار ممكن تاخده فى حياتك
لأنه قرار... مصيرى...دنيا...و...أخرة كمان
اللهم أرزقنا توبة خالصة لوجهك الكريم
طيب يا سيدى ،صلى على النبى أولا ... خد بالك إن الايمان بيزداد بالحسنات وبيقل بالسيئات
ففى حاجات كتير ممكن تزودلك إيمانك ، وحاجات ممكن تضيعهولك خالص
نبدأ بالحاجات إللى ممكن ترجعك عن قرارك
و تبعدك عن ربنا...

1.أصحاااااااااااااااابك.

أنا مبقلكش تبعد عنهم تماما..بس بقولك أول حاجة تعملها معاهم ، إنك تعلن أسلامك قصدى إلتزامك ، يعنى لازم متتكسفش إنك هتمشى فى طريق ربنا ، وتواجه أى إستهزاء يجيلك منهم بكل هدوء ، وتفهمهم إنك خلاص مش ممكن ترجع تانى وتطلب منهم بجد إنهم يساعدوك ، حتى ولو كنت شاكك فى نفسك إنك ممكن ترجع ، عايزك تكون واثق فى ربنا ، وتعلن الحرب على الاماكن اللى كانت بتجمعكم سوا ، واللى ممكن تقلل ايمانك ، يعنى مثلا كافيه فيه بنات أو شيشه أو خمور ، وأعرف إن غلطتك قداامهم مصيبة ، لأنك هتاخد إستهزاء للصبح منهم وكأنك ملاك معصوم ، فمتزعلش ، ده بالعكس مفروض إنك تفرح انه بقى ليك أكتر من رقيب ، ورد عليهم بقول سيدنا أبو بكر (إن رأيتمونى على خطأ فردونى ) ، وحاول تشغل دايما وقتك عنهم زى مثلا
1.إنك تروح تحفظ قرءان
2. تلعب رياضه معينه ممكن تلاقى نفسك فيها
3. تشترى كتاب دينى وتسلى نفسك فيه
4.طبعا تحاول إنك متنساش نصيب تلاوة القرءان
5. لو كنت فى كلية أو خلصت ، فكر إنك تاخدلك كورس كمبيوتر أو لغة.
اهه خمس حاجات علشان اصحابك بس ، وبعدين انت فكر واسترجل وخلى عندك شخصية مستقلة ، وخلى مبدئك (تؤثر ولا تتأثر) ، ومش مهم أنك تلاقى اللى يبعد عنك منهم ، لأنه كده ميستهلش انه يبقى صحبك ، وهتلاقى أصحابك الرجالة هيساعدوك على الصح، حتى ولو كانوا هما غلط ، بس لما تكون معاهم هيحترموا إلتزامك ومش هيعملوا حاجة تضايقك .
وادعى ربنا دايما إنه يكرمك بصحبه صالحة تعينك على الخير ، وكمان يهدى أصحابك .

2. الاغانى والافلام

اكيد هتقول عليا إنى متشدد ، بس فعلا والله الحاجات دى ليها تأثير علينا كلنا سواء شباب أو بنات ، يعنى مثلا من ناحية الاغانى ، طبعا هى حرام ، بس انا بتكلم من ناحية تأثيرها على التزامك ، لأنها بتحرك شهواتك ، وتفكرك بالذى... مضى... ، وغير إنها بتشغلك عن ربنا وتقسيلك قلبك ، وبعدين الاغانى دلوقتى كلها يإما حب وغرام ، يإما مسخرة وقلة أدب ، يإما بيئة وقلة قيمة
أما من ناحية الافلام والسينما ، فدى تأثيرها أخطر وأسرع ، لأنك لو فكرت فى اللى بتشوفوا فى الافلام هتلاقيه الطريق المعاكس لسكة ربنا،
يعنى كأنهم فكروا فى كل اللى بيغضب ربنا وعملوه أفلام ، والصراحة تتقال ، إنهم ماشين فى خطوات متقدمة ، بدليل إنهم وصلوا لزنة المحارم ، والشذوذ للرجالة وكمان للبنات ، ده غير الافلام اللى وصلت للكفر بربنا ، وانا والله مش ببالغ ، لإنكم أكيد فاهمين أكتر منى.

3. اللساااااااااااااااان

طبعا أنت عارف قصدى من اللسان ، وما أدراك ما اللسان ، يعنى لأزم تستغفر ربك كل متعمل ذنب بلسانك ، من غيبة أو نميمة أو شتيمة
أو الكلمات الجديدة المعبرة عن المبالغة ، زى جامدة...... وانت عارف اللى مكان النقط ، يعنى لازم تاخد بالك إن كل كلمة خارجة من لسانك هتروح يإما لميزان الحسنات أو لميزان السيئات ، فشوف قبل متتكلم كلامك مصيره ايه ، وبلاش الهزار اللى فيه كدب أو أستهزاء بحد.

وخد بالك من شتيمة أصحابك بالهزار ، بذات بالاب والام ، وكل متغلط أستغفر.




4. عقوق الوالدين

مشكلة بيقع فيها كتير مننا ، إنه يحاول يتوب لربنا ويحافظ على الصلاة بس معاملته لأبوه وأمه مش كويسه ، ومش بيستحمل منهم كلمة ، ولو كانوا كبروا فى السن ، بيحس بالخنقة من كتر طلباتهم.
هقولك خد بالك دى من أكبر العقبات فى طريقك لربنا ، لأن رضاهم عليك من رضا ربنا.
يترى أخر مرة قبلت يداهم كانت متى ؟؟؟
طيب متحاول تعملها النهارده ، معلش تعالى على نفسك وأعملها..
دايرة من نار مينفعش تقرب منها
ترك الصلاة وعقوق الوالدين.

5. الافراح

أكيد هتقول إن الراجل ده زودها ، بس انا بتكلم بصراحة عن الحاجات اللى بترجعنا أوى فى الطريق لربنا ، ومنها الافراح ، يعنى شوف الواحد بيتعزم على كام فرح فى الشهر ، وشوف فى الفرح كام أغنية بتسمعها ، ولو كنت بطلت تسمع الاغانى ، هتلاقى نفسك بتحن ..
وشوف كام بنت بتشوفها ، وانت عارف هما بيبقوا إزاى فى الافراح
ده غير إنك بتنسى التزامك ودينك فيه ، وبتشوف ناس كتير مش فى دماغها موضوع الدين فتلاقى قلبك بيتحول .
وحط فى بالك إنك ان شاء الله فرحك مش هيكون كده ، لأنه مينفعش تبدأ أول ليلة فى حياتك الزوجية بمعصية الله ، ده حتى علشان ربنا يسترها معاك دنيا واخرة.
وشوف ..لو كان الفرح ده ينفع يدخله رسول الله صلى الله عليه وسلم ، متترددش وروح ، ولو كان فى حاجة ممكن تغضب رسول الله
ومتخلهوش يدخلة ، إياك تروح ، وأوعى تحط زعل صاحبك اللى عازمك فى كفه، ورضا ربنا ورسوله فى كفه ، فتختار الكفه الخسرانه.

6. اللبس.... للبنات

لازم تغيرى لبسك ، لأنك زى مقلنا قبل كدة ، نزولك بهدوم مش كويسه هتاخدى من وراه ذنوب على عدد كل من بص عليكى
والذنوب دى هتأثر كتير على إيمانك
ووالله شكلك هيبقى أحلى بكتير وأنتى فى هدومك الشرعية
وتخيلى ربنا هيكون راضى عنك أد ايه.
وتخيلى لما الملايكة يخبروا رسول الله صلى الله عليه وسلم
بعفتك وأحتشامك ..
حاولى تاخدى قرارك قبل ما قلبك يقسى ومتعرفيش تاخديه.
ومتقوليش لما اتجوز هبقى أحتشم ، محدش عارف جوزك هتكون اخلاقه أيه ، وهيرضى بالاحتشام ولا لا ..

طيب دول كام حاجة كده ربنا ألهمنى بيهم ، وكل واحد أعلم بحاله.
فحاول إنك تنضف نفسك على طول من كل الحاجات الغلط اللى فى حياتك ، وأفتح صفحة جديدة مع ربنا.

تخيل لو عملت حادثة فى طريق سريع ، وكلمت الاسعاف وكان الطريق فاضى يترى كانت الاسعاف هتجيلك بسرعه؟ أكيد
طيب تخيل لو كان الطريق زحمة أوى ، يترى كانت هتجيلك أمتى ؟
أكيد بعد فترة طويلة
نفس الكلام تخيل لو وقعت فى مشكلة ورفعت إيدك وقلت يارب ، لو كنت منضف نفسك وفى عمار بينك وبين ربنا ، أكيد ان شاء الله الفرج هيجيلك بسرعة ، والعكس تماما لو كان بينك وبينه حائل كبير من ذنوب ومعاصى ، أكيد هيأخر عنك الفرج.
ومن الحاجات اللى بتزود الايمان ، وتثبتك على الطريق ، كالاتى :

1.الدعاء

لأنك مش ممكن تتقدم خطوه من غير الاستعانه بالله ، والدعاء مخ العبادة ، ومش لازم تتكلف فى الدعاء ، يعنى أدعى باللى فى قلبك ، وحاول تدور على الاوقات المستحب فيها الدعاء ، زى يوم الجمعة ، والثلث الاخير من الليل ، وبعد الصلوات الخمس وبين الاذان والاقامة ، ويوم عرفة ، ووقت الافطار وانت صايم
ورمضان ....ومتنساش الدعاء لكل المسلمين دايما.

2.الصلاة فى الجامع

فعلا والله من أهم الحاجات اللى ان شاء الله هتسبتك على الطريق ، هى الصلاة فى الجامع ، ومتقلش انا بصلى فى البيت ، لأنه مينفعش نقارن الصلاة فى بيت ربنا بالبيت
لأنك شوف بتاخد ثواب أد أيه أنت ورايح وانت وراجع ، وبتحشر يوم القيامة فى زمرة أهل المساجد ، وسيدنا محمد بشر اللى بيصلوا فى الجامع اوقات الليل زى العشاء والفجر بالنور التام يوم القيامة ، وتخيل إنك لو صليت العشاء فى جماعة كأنك قمت نصف الليل (يعنى صليت قيام ليل) ، ومن صلى الفجر فى جماعة فكأنما قام الليل كله .
وخلى مقياس إيمانك اليومى هو كام صلاة جماعة جبتها..
فلو أقل من تلاته تبقى مشكلة ، لغاية متعود نفسك على الخمسة وبعدين تقايم نفسك وايمانك بكم صلاة ضيعتها ومصلتهاش فى الجامع النهارده.

3.النوافل

وهما ركتين قبل الفجر ، واربعه قبل الضهر واتنين بعده ، واتنين بعد المغرب ، واتنين بعد العشاء ، غير الشفع والوتر,.

4.قيام الليل

وقيام الليل هو أى نافله بعد صلاة العشاء حتى أذان الفجر ، وأفضل وقت للقيام هو الثلث الاخير من الليل ، يعنى من الساعة واحده ونص تقريبا ، وتخيل ان ربنا بيتنزل كل يوم فى السماء الدنيا ويقول هل من مستغفر فأغفر له ، هل من تائب فأتوب إليه، هل من طالب حاجة فأجيبه ، شوفت حب أكتر من كده من ربنا لينا ، يترى بتلبى نداء ربنا ؟؟ وتقوله أنا يارب بأستغفرك وأتوب إليك ، أنا يارب بطلب منك إنك تهدينى وتثبتنى على الايمان.... أبدأ يالا من النهارده وحاول على قدر قدرتك ، ولو مش فاضى خالص ، يبقى ممكن تصحى قبل الفجر بتلت ساعه بس ، تصلى ركعتين وتقرأ حتى ولو صفحه من القرءان ، ومتنساش ركعة الوتر...

5.الصيام

لو فكرنا كده مع بعض وقلنا ايه هى الاسلحه اللى بيحاربنا بيها الشيطان ، هنلاقى إنها الشهوات بلا شك ، فلو تغلبنا على شهواتنا هنقدر بعون الله نتغلب على الشيطان
والصيام هو العلاج الامثل فى محاربة الشهوات ، فحاول على قدر طاقتك إنك تصوم ، وانا مش بتكلم عن صيام الفريضة زى رمضان لأن ده مفهوش كلام ، أنا بتكلم عن صيام النوافل زى صيام أتنين وخميس ، الثلاث ليالى القمرية .....
وسيدنا محمد صلى الله عليه وسلم أخبرنا أنه من صام يوم في سبيل الله باعد الله بينه وبين النار سبعين خريفا.

6. الصحبة الصالحة

لازم تدور عليها، وان شاء الله هتلاقيها ، لأنهم هيكونوا بفضل الله عامل كبير فى تثبيتك على الصراط .
ومتنساش دايما الدعاء.

7. أعمال الخير

أعرف أن من أهم أعدائك هو وقت فراغك ، ففكر دايما إزاى إنك تستغله فى أعمال تفيدك وتزيدك إيمانيا ، زى مثلا ممكن تروح أى مستشفى وتزور المرضى اللى فيها ، ومش لازم تكون تعرف حد فيهم ، وكل اللى هتعمله تبتسم فى وش كل المرضى وتقولهم ربنا يقومكم بالسلامة ، معتقدش ان الكلام ده فيه صعوبة.
أو ممكن تجمع أنت وأصحابك مبلغ حتى ولو كان صغير وتساعدوا بيه حد محتاج ، أو تشترى مصحف وتحطه فى الجامع ، أو تشترك مع أى جمعية خيرية وتشتغل معاهم ، بس لازم ميكنتش فى أختلاط ، أحنا ما صدقنا ناخد القرار مش عايزين حاجة ترجعنا
...........................................................

تحذيرات واجبة.....

*لازم هتجيلك أوقات تحس فيها بالفتور وإنك مش قادر تكمل ، هقولك... أثبت ... لأن ده أبتلاء من ربنا ليك أنه بيحسسك بالفتور فى أوقات علشان يختبرك ويشوف صدقك ، وكل المطلوب منك هو ..الصبر..
وتدعى ربنا يثبتك
اللهم أرزقنا الثبات يارب العالمين.

*هتشوف إن غالبية الناس غلط ، ودى هتأثر على إيمانك ، وممكن كمان تشك فى نفسك إنك أنت الغلط وهما الصح ، أو ممكن تقول لنفسك إنك ...مزودها... فهقولك الكلمة دى كلمة شيطان ، فأستعيذ بالله منه
وفكر نفسك دايما إنك لما هتموت ، هتموت لوحدك ، وهتدفن لوحدك ، وهتتحاسب بين إيدين ربنا لوحدك...
ودى هى سنة الحياة إنك تلاقى الغلط أكتر من الصح ، فلا يغرنك كثرة العاصين وكن من القله الفائزين.

*الشيطان لو معرفش يخليك تعمل حاجات غلط أوى ، ممكن يلجأ لتضيع وقتك فى حاجات فاضية ، فأنتبه من ذلك ، وممكن يلجأ أنه يفكرك بأيام زمان ، وتلاقى نفسك سرحت فى حاجات غلط عملتها قبل كدة ، فأستعيذ بالله بسرعة وأستغفره على كل اللى فات ، وحاول دايما إنك تقفل كل سكك الشيطان ، ومتنساش دايما الدعاء ، لأننا لا حول لنا ولا قوة إلا بالله العلى العظيم.

*الجدل....ودى مشكلة ممكن تقابلها كتير ، كل حاجة بتعملها هتلاقى اللى بيجادلك فيها ، زى مثلا لو قاعد مع أصحابك ، والاذان أذن ، وقلتلهم يالا نروح نصلى فى الجامع ، هتلاقى اللى يقولك منصلى هنا ، محنا برده هنا هنصلى جماعة ، فرد عليه : هنا مش زى هناك ، ومتوجعش دماغك معاه ، أنت عليك النصيحة ...
أو مثلا تلاقى اللى بيجادلك فى إنك لازم تصاحب بنات ، أو يقولك الدنيا متتخدش كده ، أو بلاش تشدد...
فياريت تحاول تقفل كل سكك الجدل ، وتواظب على النصيحة بأسلوب هادى..
وخد انت النصية دايما من حد واثق فى علمه ، لأنك هتلاقى اللى ليه فيها واللى ملهوش بينصحك ، وبينصحوك فى أيه؟ فى أنك ترجع ومتتشددش فى الدين ...
فأثبت ، وأعرف أن الملتزم شعاع نور ، إن لم يستطع الشيطان إطفائه ، سلط عليه أصحابه.

*لو كنت مواظب على عباده معينه زى مثلا قيام الليل أو صيام نوافل ، ولقيت نفسك بتقصر ، فأعلم أنك بترجع للوراء ، فأدعوا الله الثبات ، وأرجع تانى بقوة.

*تخيل دايما نفسك إنك على الطريق المستقيم ، وقدامك الناس الصالحين ، وقدامهم الجنة ، ووراك العصاة والشياطين ، وتحتك النار ، فسير سريعا الى الامام كى تكون مع الصالحين وتصل للجنة ان شاء الله ، ولو وقفت ممكن تقع أو يلحق بيك من خلفك ، فترجع مرة أخرى...
اللهم أرزقنا الثبات على دينك وعلى سنة حبيبك المصطفى صلى الله عليه وعلى اله وصحبه وسلم.

*أعلم إنك لازم تتنازل على شهواتك فى الدنيا ، علشان ربنا يعوضك فى الجنة ، والله عنده حسن المئاب ، والجنة دى مش حاجة رخيصة علشان ميبقاش ليها ثمن ، بالعكس
كما قال صلى الله عليه وسلم (( ألا إن سلعة الله غالية ، ألا إن سلعة الله الجنة )) صدق رسول الله صلى الله عليه وسلم.

*أعرف من أنت ومن الله ، أعرف قدرك دائما ، وأعرف قدره . ولا تنسى أن الفضل بيد الله
فلا تغرك عبادتك ، وتواضع لله ، وأعلم أنك ملاقيه...

*كل أيه تعرفها أو حديث حافظه ، لو معملتش بيه ، هيكون حجة عليك ، فلا تستهتر وأعرف إن الدين مش لعبة.

*أوعى تشوف حاجة غلط قدامك وتسكت خالص ، لأ ، لازم تعمل اللى تقدر عليه ، يعنى لو فى بيتك وتقدر تغير بإيدك غير ، ولو فى الشارع وتقدر تغير بلسانك بإسلوب محترم فغير ، ولو متقدرش فغير بقلبك ، يعنى كون من جواك محروق إنك شايف حد بيعصى ربنا وأنت مش قادر تعمل حاجة ، وأستغفر ربنا وأدعى ليك وللناس بالهداية.

*دايما فكر نفسك بالموت ، لأنه من أسباب علو الهمة ، وخليك دايما فى الحياة ، فى رحلة التنظيف الداخلى فى نفسك ، وحاول أكتشاف أمراض نفسك الدفينه من حسد وحقد وكبر وغل ونفاق ، أعاذنا الله وأياكم.

إن وفقت فى كتابتى ، فما توفيقى إلا بالله عليه توكلت وإليه أنيب ، وأن كان هناك خطأ فإنه منى ومن الشيطان الرجيم.
اللهم أرزقنا الاخلاص فى القول والفعل والعمل
وصلى اللهم على محمد وعلى أله وصحبه وسلم

اللهم أرزقنا الاخلاص فى القول والفعل والعمل
وصلى اللهم على محمد وعلى أله وصحبه وسلم
.........
ربنا يصلح احوالنا جميعا ويهدينا
وبارك الله فيك

أمين يارب

اللهم امين
جزاك الله كل خير

الله ينور موضوع جميل خالص بس كنت عايزه اعلق علي نقطه حضرتك بتقول لما تمشي في طريق ربنا لازم تواجه اي استهزاء هو طريق ربنا بقي استهزاء علشان كده انا معنديش اصحاب في المعهد خااالص واتمني اني اخلص الاربع سنين علي كده بارك الله فيك ومستنين احسن

نايس توبك وربنا يبارك فيك ويهدينا جميعا

ومزيد من التقدم كدا يارب ويصلح احوالنا جميعا

اللهم لا الاه الا انت خلقتنى وانا عبدك وانا على عهدك ووعدك ما استطعت أعوذ بك من شر ما صنعت ابوء لك بنعمتك على وابوء بذنبى فاغفرلى انه لا يغفر الذنوب الا انت

اميييييييييييييييييييييييييييين
نورتى ي اامنيه
ويار ب يصلح حالك

جزاك الله كل خير

جزاك الله كل خير

تسلم ايدك يا زيزو ع الكلام الجميل
جزاك الله كل خير وجعله فى ميزان حسناتك

تسلمو على المرو